Bru enfiah chhunzawm zel

Tripura-a Mizoram Bru raltlânte hruai kîr tumna kal zelah, Inrinni khan Asapara camp-a Mizoram Bru-te endik chhunzawm leh an ni a, an la zawh hman loh avangin vawiinah an chhunzawm leh ang.

Inrinnia Asapara camp-a endikte hi Mamit district-a awm tura ngaih chhungkaw 202-a mi 1,299 an ni a; November 11, 2016-a enfiah tawhte nen Asapara-ah hian chhungkaw 436-a mi 2,865 enfiah tawh an ni.

Asapara camp-a mite hi November 11-12 chhunga enfiah zawh hman tum ni mah se, ni hnih chhunga enfiah zawh hman an nih loh avang hian vawiinah pawh chhunzawm leh tur a ni.

Ruahman dan chuan, naktuk aṭanga November 18 thleng Naisingpara camp-a mite enfiah an ni ang a, November 21-ah Hazachera camp-a mite enfiah leh an ni ang.