Sports Minister-in Stadium sak mek a enfiah

Sports & Youth Ser­vices (SYS) minister Zodintluanga chuan, Inrinni khan Champhai Zotlanga Sports Stadium sak mek a tlawh a, hna thawh mekte a enfiah.

Champhai Zotlang Sports Stadium sak mekah hian, khelmualah phûl lem phah leh gallery siam hna zawh a ni tawh a; intlansiakna (running track) tur erawh zawh a la ni lo a, zawh thuai beisei a ni. Minister chuan, hna thawk mektute chu ṭha taka thawk turin a hrilh.

Zodintluanga hian Zotlanga Damdam Memo­rial Hall-ah Champhai South Block Congress Committee inkhawm a hmanpui nghal a, an party zawm thar mi
ṭhenkhat a lawm lut.

Zodintluanga chuan, politics boruak a inlumlet mek a, mipuiin Congress party an bawh zel avangin an party chu inthlan leh hunah a sorkar leh dawn nia sawiin, "Kan sorkar hian kan thil tih ṭhat aṭangin sorkar leh kan tum," a ti.

Congress inbuatsaihna chu hmasawnna (deve­lopment) a nia sawiin, Zodintluanga chuan, "Infrastructure develop­ment-ah nasa takin kan tlân a, Zoram hmél tidanglam turin hmasawnnah kan tlan a, eizawnna siam turin nasa takin NLUP-ah hma kan la a ni," a ti a; mi harsa zawk leh kut hnathawktute'n lei rem an rahna tur an ngaih pawimawh ber thu a sawi.

PHE minister ni bawk Zodintluanga chuan, MNF kum 10 chhunga PHE de­partment-a Central aṭanga major work an thawh chu cheng nuai 20,111.75 a nih laiin, Congress sorkar kum riat vel chhungin cheng nuai 67,324.88 a nih thu a sawi a, "A inthlauhna ringawt nuai 47,213.15 a tling a ni," a ti.