Vanglaini zirchianna Pawisa thiin Mizoram lirthei zuarte a nghawng em?

November 8, 2016 zana prime minister Narendra Modi-a'n Rs. 1,000 leh Rs. 500 note thih thu a puan hnuah ram pumah harsatna a awm. Mizoramah pawh dawrkai leh sumdawng tam tak a nghawng zingah Aizawla lirthei leh lirthei ke hnih nei zuarte a nghawng a, dawr ṭhenkhat erawh a nghawng lem lo.

Lirthei zuartute chuan pawisa hman theih loha a awm thut avangin an lirthei zawrhte chu an hralh hleithei lo a, an hnena lirthei lei tuma hauh lâwk (book) tawhte pawhin pawisa pek belh tur an neih loh avangin an la thei lo tih an sawi. Hetih lai hian, dawr ṭhenkhat chuan an buai phah lo niin an sawi thung.

Vanglaini palaiin a zawh kualnaah Aizawla lirthei zuar hlun National Business Enterprise, Khatla chuan November 9, 2016 aṭanga Rs. 500 leh Rs. 1,000 note hman theih loha dah a nih hnuah lirthei an hralh hlei thei lo niin an sawi a; November 9 aṭangin an hralh lo nghal nia sawiin, "A hmaa book tawh sa pakhat chiah a awm a, hei pawh hian insurance tihna tur chiah an nei a, pawisa an pek lâwk avangin hei hi kan laksak thei a ni, " an ti.

National Business Enterprise hotute chuan, an lirthei hralh ṭhinte chu loan hmanga an pek ṭhin thu te, pawisa lak chhuah theih a tlem tâk avang leh lirthei man chu pawisa faia an pek ṭhin avangin a buai phah hle niin an sawi a; tunah hian book sa, pek chhuah ngaihna awm rih lo pasarih an kawl mek niin an sawi bawk.

Kulikawna awm RLC Business Agency hotute chuan, an lirthei zawrh, lei tura book sate chu lak lohin a awm phah nual niin an sawi a; sorkarin contractor-te pawisa a hrênsak rih avangin lirthei an hralh theih loh phah nia an ngaih thu sawiin, "Pawisa pek lâwk tur hi cheng nuai thum ni ta se, tunah chuan chêt ngaihna a awm rih lo. Book lâwkte hian 25% dah a ngai a, bank nena thawkho kan nih avangin instalment-a hralh dawn pawhin sum ber an lak theih rih loh avangin a harsa a ni," an ti. Pawisa lemah fimkhur a ngaih thu leh pawisa lem an dawn chuan an tan hlohna a nih dawn avangin pawisa dawn pawh an fimkhur phah hle niin an sawi.

Zothan Auto Works neitute chuan, an lirthei zawrhte chu a hlawm a len avang leh an hralh dan phung aṭanga an chhûtin pawisa harsatna chuan nghawng a nei lutuk lo niin an sawi ve thung. Tuna pawisa thi Rs. 1,000 leh Rs. 500 note chu an dawng thei tih an sawi a, thla khatah a tam berah lirthei 50 an hralh tih loh chu chawhrualin 30-35 vel an hralh ṭhin niin an sawi a ni.

Hyundai pawhin an lirthei hralh-naah pawisa note tihthihin nghawng a nei lutuk lo nia sawiin, ni khatah 2/3 vel an hrilh ṭhin thu leh an hralh zat chu pawisa thiin a nghawng lem lo niin an sawi a; pawisa tih thih tûk November 9-ah erawh chuan lirthei pakhatmah an hralh lo niin an sawi. Hetih lai hian, mi dang ang thoin Rs. 1,000 leh Rs. 500 note lem dawn a hlauhawm avangin fimkhur taka an kalpui thu an sawi bawk.

Aizawla lirthei ke hnih nei (two wheeler) zuarte erawh chuan pawisa note tihthihin nasa takin nghawng a, lirthei an hralh tlem phah viau niin an sawi hlawm.

Khaia & Sons, Vaivakawn chuan, an hnena lirthei lei tum zingah ATM a hman theih loh leh zel vanga lei thei lo an awm tâk thu te, pawisa kawl lo, la chhuak thei si lo an tam niin an sawi. Bike chu loan-a pe tur pawhin Rs. 10,000 vel tal pêk lâwk a ngai a, bike lei duhte'n pawisa pek lâwk turah harsatna an tawh hlawm avangin an buai phah deuh nia sawiin, ni khatah pahnih/pathum vel an hralh ṭhin thu an sawi a ni.

Suzuki two wheeler zuartu, LBS Suzuki chuan, pawisa thi vangin an lirthei zawrhah nghawng a nei nasa nia sawiin, "Book sa a awm nual a, an la chhuak thei lo. Cheque nei lo an ni tlangpui a, ATM a hman theih bawk si loh," an ti. Ni khatah lirthei paruk/pasarih vel an hralh dan tlangpui a nih thu te, October thla khan ni 1 aṭanga ni 12 thlengin lirthei 130 an hralh hman laiin, tun thlaah erawh chuan pawisa thi vang nia ngaih theihin 70 vel chiah an la hralh niin an sawi.

Mahindra two wheeler dealer, Zamliana Enterprise, Chanmari-te chuan, scooter (scooty) kawl sa an ngah loh avangin pawisa thi hian nghawng a nei lem lo niin an sawi a; an hralh dan a pangngai thu te, an dah sa pahnih lek chu Inrinni khan an hralh zawh thu an sawi. Workshop lamah erawh chuan miin pawisa an hman loh vang nia ngaih theihin a reh deuh duk niin an sawi thung.