KHAWTHLIR

Thisen pe

Aizawl College Veng branch KṬP chuan an din champha vawi 38-na pualin Inrinni khan Synod Hospital tan thisen unit 38 an pe a, a petute mipa 34 leh hmeichhia pali an ni. Inrinni vek khan Bethlehem Veng­thlang Branch YMA chuan Aizawl Civil Hospital tan thisen unit 27 an pe a, a petute mipa 24 leh hmeichhia pathum an ni.

Minister-in tlawh

AH&Vety minister C Ngunlianchunga chuan Inrinni khan Thenzawla AH&Vety department hmun a tlawh a, an kalphung leh an hmunhma tihhmasawnna tur atana thil pawimawh hrang hrang a enfiah.

Office hawng

Champhaia PHE (WATSAN) Superintending Engineer pisa chu November 11, 2016 khan NLUP Implementing Board chairman JH Roṭhuama, MLA-in a hawng. PHE SE office hi July 7, 2012 aṭanga sak ṭan niin, June 26, 2015-ah sak zawh a ni a, a sak nan cheng nuai 148.58 an hmang.

Kawng siam

ITI Veng Local Council bultumin Inrinni khan ITI veng chhung inkal-pawhna hrang hrang hnatlangin siamṭhat a ni a, kawng chhe laite chu alkatra hmangin an siam ṭha a ni. Kawng siam nan hian veng chhunga mi inphalte sum thawhkhawm bakah Mizoram Technocrats Company pawisa thawh hman a ni.

Tla hlum

Lallawmkima (33), Chanmari West chu November 11 zan khan Lammuala inkhel enna gallery aṭangin a tla a, a hliam tuar loin he mi zan vek dar 1:20-ah
New Life Hospital ICU-ah a boral.

Cong-ah VC inlet

November 12, 2016-a Damdam Memorial Hall, Champhai Zotlanga inkhawmah Champhai Kanan Venga MNF VCP Kapsara chu Congress party-ah lawm luh a ni a, hei vang hian Kanan Veng V/C-ah Congress party-in sorkarna an siam. Champhai Zion Veng, V/C member panga awmnaah pawh Congress V/C pahnih an awm a, ZNP V/C member pakhatin Congress a thlawp avangin Congress party-in V/C-ah sorkarna an siam thei tawh nia thu dawn a ni.