Governor-in khaw pathum a tlawh BSF-te ramri venhim dan a sawipui

Governor Lt. Gen. Nirbhay Sharma chuan Inrinni khan helicopter hmangin Tlabung, Mamit leh Tuipuibari a tlawh a; Tuipuibari-ah 181 Bn. BSF hotute ramri ven chungchang a sawipui.

Tlabunga amah lawmna inkhawm, Zodin Indoor Statdium-a buatsaihah Larsap chuan, inkalpawhna kawng chhiat vanga Tlabung leh a chhehvel mipuite harsatna a hriatpui thu sawiin, "Inkalpawhna kawngpui hi mipui khawsak phung nghawng a nih avang-in a pawimawh," a ti a; Tlabung mipuite'n inkalpawhna kawng ṭha zawk an neih theih nan sorkar hotute hmalak dan tur a sawipui tawh thu a sawi.

Governor chuan, Mizoram mipui nuai 10 chuang zingah hna thawk thei dinhmuna ding mi nuai nga vel an awma a rin thu sawiin, "Chung mite thawh tur chu sorkar pek vek theih a ni lo. Sorkar hnuaia thawh kher tum loa mahni intodelh a ṭul. Mizo ṭhalai tam zawkin sipai nih an tum ṭhin hi a lawmawm hle," a ti.

Mipuite'n hriat duh an neih hrang hrang an sawite chu Governor hian a chháng nghal bawk.

Mamit a tlawhnaah Governor hi Mamit DC Lalbiaksangi hoin sorkar official-te'n an lo dawngawng a, Chhimveng YMA Hall-ah inkhawm buatsaihah thu a sawi.

Lt.Gen. Nirbhay Sharma chuan, Mamit district chu hmasawn chak leh hna thawk
ṭha nia a hriat thu sawiin, "Mizorama cheng zawng zawngte hi hnam leh sakhua hrang ni mah ila, inpumkhat thiama kan ṭanrual a pawimawh ber a ni," a ti.

Tuipuibari-ah Governor hian 181 Bn. BSF hmun a tlawh a, BSF hotute chu ramri ven hna an thawh dante sawipuiin, an bul vela chengte nena inlaichhina leh thawhhona ṭha nei turin a hrilh.

Governor hi minister John Rotluang-liana leh MLA Nihar Kanti Chakma-in an
ṭawiawm a ni.