Assam Rifles DIG-in CM a kâwm

Assam Rifles 23 Sector DIG Brig. Digvijay Singh chuan nimin khan chief minister Zoramthanga a hmu a, kum 2020 chhunga Mizorama Assam Rifles hmalaknate leh an hmachhawpte a hrilh.

Brig. Digvijay Singh chuan, Mizote tihhmasawnna tura kum 2020 chhunga AR-in hma an lâknate chu chhunzawm zel an tum thu a sawi a, "Khawtlangah hmasawnna a awm theih nan te, mipui tihhmasawn nan te, remna leh muanna kengkawh zel turtein hma kan la zel dawn a ni," a ti.

Assam Rifles DIG chuan, kum tharah AR-in Mizoram pumah 'Anti Drug Campaign' kalpui an tum tih sawiin, "Hei hi Mizo ṭhalaite damdawi hman sualna laka chhan chhuahna leh ruihhlo tawlhrûk venna tur a ni," a ti a; Mizo ṭhalai zingah ruihhlo ti an tam avangin theihtawp chhuah an tum thu a sawi.

CM Zoramthanga pawhin Assam Rifles hmalakna chu ṭha a tih thu sawiin, duhsakna a hlàn a; Mizo mipui leh Assam Rifles inkarah inkungkaihna ṭha a awm zel a beisei thu a sawi.

Lungleia awm Assam Rifles-te chuan nimin khan Lawngtlai district-a Parva khuaah vaihlo zûk leh hmuamin mihring hriselna a tihchhiar dan zirtirna an buatsaih. He hunah hian Parva VC member-te leh mi dangte an tel a ni.