YMA Joint Duty-te ruihhlo man hâl

Chhinga Veng, Dawrpui, Electric Veng, Saron Veng leh Zarkawt branch YMA-te thawhhona, YMA Joint Duty-te chuan ruihhlo an man khawm eng emaw zat chu Inrinni khan Dawrpui School kawtah an hâl a; hei hi ṭum hnih ruihhlo an hâl ralna a ni.

Ruihhlo hâlna hunah hian YMA branch panga hruaitute an tel a, Zarkawt Local Council chairman Lalzamliana'n a hâl. Ruihlo an hâlte chu kumin October 4 leh November 11 inkara an mante a ni a, tualchhunga an hralh ṭhinna ang chuan, Rs. 4,94,790 hû a ni.

YMA Joint Duty chuan, New Market leh a chhehvel veng pangaa ruihhlo ti
ṭhin te, rûkrute leh awm ṭha duh lote chu insaseng turin a chah a; kohhran leh mimal tinte chu ṭawngtaipui tur leh YMA duty-te ṭawiawm turin an ngen bawk.

Kumin October 4 leh November 11 chhung hian mi 399 an khâwm a; chung zinga mi 58 chu home-ah danin, mi pathum chu police hnenah an hlan. Excise & Narcotics hnena hlan mi pa-hnih leh Child Welfare Committee hnena pek mi pathum an awm bawk.

Ruihhlo hâlte chu heroin hawng 4, bûr 77 leh chhìnsen 19; Alprazolam mûm 34, Spasmolar tlêp thum leh mûm nga; Tramator tlêp khat; Nap10 tlêp ruk; Cyclopam tlêp hnih; Addnok mûm 11; ganja grain 774 leh pack 21; sap zu ûm 18 leh, rakzu fûn 243 a ni.