Railways minister-te'n Larsap leh CM kâwm

Zan khat riaka Mizo-ram tlawha rawn zin, Union Railways minister Suresh Prabhakar Prabhu leh minister of state for Railways Rajen Gohain te chuan November 11, 2016 tlai khan Governor Lt.Gen. Nirbhay Sharma leh chief minister Lal Thanhawla an kâwm a; thil pawimawh hrang hrang an sawipui.

Railways minister-te hian Governor hi Raj Bhavan-ah an kâwm a; Larsap chuan, "Sorkar laipui hmalakna zarah Mizoram khawpui Aizawl aṭanga km. 20 maia hlá Sairangah rêl a lut tur hi hmasawnna rahbi ropui tak a tling," a ti a; Mizoram chu international border thui tak Myanmar leh Bangladesh nena inṭâwm a nih avangin inkalpawhna leh inbiakpawhna chang-tlung a mamawhzia Union Minister-te a hrilh.

Suresh Prabhakar Prabhu chuan, Mizorama rél kawng an sialnaah hna hautak mah se, sorkar laipuiin theihtawp chhuah a tum thu a sawi a, "A ṭul chuan Defence Minitry leh Transport Ministry nena ṭangkawpa mamawh sum pawh ngaihtuah theih a nih ka beisei. Sorkar laipuiin hmasawnna a kalpui dan turah hian hma hun thui tak thlir chungin hna thawh zel a tum," a ti.

Railways minister-te'n CM Lal Thanhawla an kawmnaah, India hmar-chhak atana Railways hmathlir buatsaih mek a nih thu an hrilh a, "He hmathlir-ah hian eng nge ṭha ang a, eng nge tih chi ang tihte leh ram mipuite mamawh eng nge a nih tihte ngaihtuah a ni dawn," an ti.

Chief Minister chuan, Railways hmasawn zel atan hmathlir ṭha leh zau tak neih chu ṭha a tih thu sawiin, hmarchhaka rél kawng tihhmasawn nan thil pawimawh tak a nih a beisei thu a sawi.

Union Railways minister Suresh Prabhakar Prabhu hian November 11 chawhma khan Sairanga rel chawlhhmun tur lungphùm a phúm a; Inrinni khan Aizawl chhuahsanin Imphal an pan a ni.