COVID-19: Mizoram dinhmun Hripui vei mi 5 hmuh belh a ni

December 30, Nilaini khan Mizoramah Covid-19 vei mi panga hmuh chhuah a ni a, natna (Covid-19 symptom) lang chhuak an awm lo a, Mizoram chhunga hri kai pakhat a awm. Nimin khan hripui laka fihlim tawh mi pasarih chhuahtir an ni thung.

Covid-19 vei hmuh thar mi pakuate chu mipa pali leh hmeichhia pakhat an ni a; ZMC laboratory-a hmuh mi pathum leh TrueNAT-PCR hmanga hmuh mi pahnih an ni a; Rapid Antigen Test (RAT) hmanga endik zingah hmuh chhuah a ni lo.

Nilaini khan Mizoramah swab sample 1,048 endik a ni a, ZMC laboratory-ah mi 240, TrueNAT-PCR hmangin district pariatah mi 227 leh RAT hmangin district pakuaah mi 581 endik a ni. Hripui vei mi panga hmuh chhuahte chu sample endik zat 1,048 aṭangin 0.48% a ni.

Sorkar thuchhuah tarlan danin, ZMC-a hmuh chhuahte chu Aizawl district-a swab sample lak vek an ni a; symptom nei an awm lo a, an zingah tualchhunga hri kái pakhat a tel.

TrueNAT-PCR hmanga Covid-19 positive hmuh chhuahte chu Lunglei Civil Hospital-a hmuh an ni a; BSF sipai, symptom nei lo ve ve an ni.

Nimin khan Covid-19 laka fihlîm tawh mi pasarih chu enkawlna hmun aṭangin chhuahtir an ni a; SRH-ZMC aṭangin mi pahnih, Lunglei Pukpui CCC leh Kolasib SIRD CCC aṭangin pakhat ve ve leh, Lawngtlai CCC aṭangin mi pathum an chhuak.

Mizorama Covid-19 vei mi 4,204 hmuh chhuah tawhte chu mipa 3,088 leh hmeichhia 1,116 an ni a; nimin tlai dar 5 thleng khan damin mi 4,098 (97.48%) chhuahtir an ni tawh a, mi pariat (0.19%) thi tawhin, enkawl mek mi 98 (2.33%) an awm.

December 30 thleng khan Mizoramah swab sample 1,79,594 endik tawh a ni a, chu'ng aṭanga Covid-19 positive hmuh chhuah tawh 4,204 chu 2.34% a ni.

Mizorama Covid-19 positive hmuh chhuah tawh mi 4,204 zinga mi 1,992 chu Mizoram chhunga kái an ni a, mi 2,212 chu state páwn aṭanga rawn lût an ni.

ZMC-a hmuh chhuah:

Electric Veng - 1: Hmeichhia kum 69, a chênpuite zinga +ve hmuh chhuah tawh, home quarantine mek, symptom nei lo.

Chaltlang - 1: Mipa kum 29, Tripura aṭanga haw, quarantine facility-a awm mek, symptom nei lo.

Zemabawk - 1: Mipa kum 21, Meghalaya aṭanga haw, home quarantine lai, symptom nei lo.

TrueNAT-PCR-a hmuh:

BSF, Lunglei - 2: Mipa kum 27 & 39; Lunglei Zotlanga 199 Bn BSF mi leh sa, tun hnaia West Bengal aṭanga rawn lut, quarantine facility-a awm mek, symptom nei lo ve ve.