Rs 500 & Rs 1,000 note thih vangin RBI-in chi-ai lo turin mipui ngen

Reserve Bank of India (RBI) chuan thuchhuah siamin, Rs. 500 leh Rs. 1,000 note thleng theih hun a la rei a, note tihthih vanga phílí buai lo purin mipui an ngen.

RBI chuan, "Kan hman lai mek Rs. 500 leh Rs. 1,000 note hlutna hnuh kîr chungchangah harsatna leh bahlahna awm lo a, note dang hman lai mek nen tluang taka thleng kual hi bank ho tana mawhphurhna pawimawh tak a ni. Pawisa hman theih tak lohte rang taka ATM-a awm sa lak chhuah hi sorkar laipuiin pawisa note a tihthih aṭanga darkar tawitê chhunga tih nghal a nih bakah, pawisa hman theiha thlak hi ni hnih chhunga zawh nghal a ni," an ti.

Mipuite'n awlsam taka pawisa an thleng kual theihna turin ram chhunga bank branch zawng zawngah pawisa tihthih aṭanga ni khatah pawisa thleng theih turin ruahmanna siam nghal a nih thu tarlangin RBI chuan, "Mipuite harsatna tikiang thuai tur hian RBI office leh ram chhunga bank branch zawng zawngte'n counter hawn belhin, hna thawh hun pangngai aia rein hna an thawk a ni," an ti a; November 10, 2016-ah cheng vbc. 10 thleng a nih tawh thu an sawi.

RBI tarlan danin, pawisa awm mek hman theih chu (Rs. 2,000 note thar telin) ram chhung currency chest 4,000-ah chhêkkhawl a ni a, chu chuan mamawh zualpui a phuhru tura ngaih a ni. Pawisa dahkhawl aṭangin bank-te chu an mamawh pek chhuah zel a ni a, note chhutna hmun printing press-ah pawh nasa lehzualin hna thawh a ni bawk.

Theihtawp chhuah a nih mek laiin, mipuite chu pre-paid card, rupay/credit/debit card, mobile banking, internet banking-ahte inleh nachang hre thar tur leh mahni lo insiam rem tura an duh thu sawiin RBI chuan, "Jan Dhan Yojana (JDY) account nei sate leh card dawngte chu hmang ṭangkai tura ngen an ni. Heng hi kan hman ṭangkai thiam chuan pawisa fai mamawhna a tlem ang a, hmasawnna nasa tak a ni ang," an ti.

Rs. 500 leh Rs. 1,000 note tihthih tâkte hi India ram pumah December 30, 2016 thleng bank-ah thleng theih a ni dawn a, chumi hnuah chuan RBI office ruat bik hmunah thleng tur a ni thung ang.

Mizoramah chuan pawisa note thleng tum leh dah luh tuma bank dawr an lam tam hle a, State Bank of India (SBI) chuan an ATM hrang hrangte hman theih turin an buatsaih zel a, pawisa lak chhuah tum intlar an tam hle.

Dawr ṭhenkhatin pawisa kir tur awm loh avangin Rs. 500 leh Rs. 1,000 note dawng thei lo mah se, Vanglaini palaiin dawr hrang hrang a tlawh kual tam zawkte chuan pawisa nawi lamah harsatna an tawk tawh lo.