Aizawlah two wheeler taxi 3 vel a awm tawh

State Transport Au-thority (STA)-in rua-hmanna a siam angin, Aizawlah two wheeler taxi a tlan ṭan tawh a, tunah hian pathum vel a tlan mek nia thu dawn a ni.

Transport director R Remmawia'n Vanglaini palai zawhna chhanga a sawi danin, Transport de-partment chuan Aizawla tlan turin two wheeler taxi permit 213 an pe chhuak tawh a; mahse, permit pek chhuah tawh tam zawkin an la la chhuak lo a, nimin thleng khan mi 91-in an la chhuak tawh. Permit la chhuak tawh 91 zingah pawh registration ti chu pathum chiah an la awm a ni.

Two wheeler taxi permit hi June 21, 2016-ah dilna hawn ṭan a ni a; Transport minister John Rotluangliana sawi danin, ruling leh opposition thliar loin, MLA 40-te hnenah two wheeler permit pek tur mi panga ṭheuh
rawt tura hriattir a ni.

Two wheeler taxi atan hian two wheeler chu kum hnih aia upa lo a, engine 150 cc aia tê lo a ni tur a ni a; tax, fee, permit leh certificate-te transport vehicle-a mamawh ang zawm vek a ngai. Transport vehicle registration number plate hman ang, plate eng (yellow)-ah hawrawp dum (black)-a number ziah tur a ni a, helmet pawh ISI chuang hman tur a ni.

Plying permit chu kum nga atan pek a ni a, kum nga hnuah service tlak a la nih chuan kum nga dang permit pek belh theih a ni. Chuan man (fare) chu km. 1-ah Rs. 10 a ni a, km. 1 aia thuiah chuan Rs. 5 zelin a pung ang. Two wheeler taxi mipa khalhin mipa leh hmeichhia an phur thei a, hmeichhe khalhin hmeichhia chauh an phur thei thung.