MPF-in ZNP pisaah sorkar ṭha an sawi

Mizoram People Forum (MPF) chuan nimin khan ZNP pisaah sorkar inrêlbàwlna ṭha (good governance) chungchang an sawi.

MPF aṭanga ZNP pisaa kalte hi general secretary Rev.Dr R Lalbiakmawia, joint secretary Rev. Lallawmthanga leh resource person Lalthlamuana Ralte, Pachhunga University College-a assistant professor-te an ni.

Rev.Dr R.Lalbiakmawia chuan, ram hmasawnna kai rual tur leh mi tinin sorkarah neitu rilru an put theihna turin development plan hrang hrangah village level dah pawimawh a ṭul nia an hriat thu a sawi a, "Hei hian nasa leh zualin neitu rilru a puttir dawn a, ram hmasawnna atan a pawimawh a ni,” a ti.

Lalthlamuana Ralte chuan, sorkar rin ngam nei turin mawhphurhna la ngam sorkar a din a ṭul tih sawiin, "Mawhphurh ngamna (accountability) kan mamawh a, thil chhia a lo thlenin mawhpuh tur kan zawng a, thil ṭhaah chuan kan tih tiin kan sawi leh si a ni,” a ti a; thil chhia, vanduaina a thlen pawha mawhpuh tur zawng kual loa mipuiin hruaitu tak taka an en ngam, mawhphurna la ngam ram hruaitu Mizoramin a mamawh thu a sawi.

Huapzo sorkar chungchangah Lalthlamuana Ralte chuan, "Mi harsa leh chhumchhiate'n a zár an zo ve phâk loh sorkar chu sorkar ṭha a ni thei lo a, mi zawng zawng huapzo sorkar, ruling party mite ta chauh emaw, Aizawl khawpui chhung chauh emaw ni lo sorkar kan mamawh a ni,” a ti.

ZNP president Lalduhoma pawhin thu sawiin, corruption leh thil hrang hrangah ZNP chuan system thlak an aupui tih a sawi a; "Lui chu a hnár a fîm chuan a mawng lam pawh a fîm tih ngawt piah lamah hian, a tihfim dan kan zuar tel a ni," tiin a sawi.