District hrang hrangah Naupangte Ni hman a ni

Nimin khan Lunglei, Kolasib, Mamit leh Lawngtlaiahte Nau-pangte Ni (Children's Day) pualin hun hman a ni. Lunglei-ah chuan Lunglei District Child Protection Unit bultumin naupangte dikna leh chanvo hum-halhsakna tur leh mipuite'n an hriat chian zel nan rally neih a ni.

Rally puala inkhawm tawi buatsaihah Lunglei SP Zosang-liana chuan, "Naupangte hlutna leh pawimawhna hre vektu kan ni a, nakin lawkah kan ram hruaitu leh mi ropui turte an ni a, naupang dikna humhalh chungchang ah hian police leh khawtlang angte'n chanvo pawimawh tak kan nei a ni," a ti.

Lunglei CDPO Rotluanga chuan, "Lunglei pawhin ram ropui ni tur chuan naupang aṭanga kan ṭan a ngai. Chumi tur chuan chaw ṭha, ei leh in tur ṭha pek an ngai. Naupangte hi nakin lawka kan ram hruaitu turte an nih avangin enkawlna leh kaihhruaina kawngah nu leh pate'n mawhphurhna sang tak an nei," a ti a; naupangte dikna leh chanvo humhalhsak a pawimawh thu a sawi.

Children's Day puala Mara-thon Rally-ah hian sikul naupang leh tlawmngai pawlte chu Lung-lei Police Station bul aṭanga Children’s Park, Chanmari thleng an tlan a ni.

Lawngtlaiah chuan District Child Protection Unit, District Legal Services Authority leh World Vision India-te buatsaihin DCPU office-ah hun hman a ni a; he ni puala a thlawna inentirna buatsaih chu chief judicial magistrate (CJM) Laldinpuia Tlau-in a hawng.

Laldinpuia Tlau chuan, nau-pangte dikna chanvo humhalhsak a ṭul thu sawiin, "UN duh dan angin, naupangte'n taksa pum-rua, khawvel finna leh Pathian hriatnaah hmasawnna changin, venhimna an dawng tur a ni. An chungthuah tel vein thu an nei ve tur a ni a; khawvel hi nuam taka an hman theih nan an mamawh engkim ngaihtuahsak tur a ni," a ti.

Naupangte Ni puala free clinic buatsaihah hian Aizawl aṭangin doctor chah a ni a, nilengin inentirna hun hawn a ni.

Children's Day pual hian Kolasib-ah chuan District Child Protection Unit buatsaihin Parish Hall-ah hun hman a ni a, Kolasib DC H Lalengmawia'n a hmanpui.

Kolasib DC chuan, Nau-pangte Ni-ah naupangte enkawlna kawngah nu leh pate leh zirtirtute'n mawh thui tak an nei tih hre thar leh turin a chah a, "Naupangte chunga harsatna thleng tam tak hi puitling zawkte'n nawmsak kan duh vang a ni. Naupangte humhalhna dan thui tak a awm a, nu leh pate dan hnuaiah kan him lo thei," a ti.

Naupangte Ni pual hian nursery aṭanga pawl 4 zirlaite tan Drawing Competition Open a neih a ni a, middle school tan Drawing Competition buatsaih niin, high school leh higher decondary school-te pualin slogan inziahsiak buatsaih a ni bawk.

Mamitah pawh District Child Protection Unit buatsaihin IPR Conference Hall-ah hman a ni a, Mamit SDC Lalneihthanga Kawlni khuallian a ni. Lalneih-thanga chuan, naupangte ngaih-sak a ṭul thu sawiin, "Kan ram leh hnam, khawtlang htuaitu turte an ni a, naupangte dikna leh chanvo hi puitlingte nen a inang reng a, rahbehsak loa humhimsak hi puitlingte mawhphurhna a ni," a ti. Mamit SP Abhisek Dhania pawhin thu a sawi.

Mamita Children's Day hman-naah hian naupangte hnen aṭangin zaipawl leh item dang ena ngaihthlak a ni a; chithlum mûm sem a ni bawk.