World Diabetes Day hman a ni

Nimin, November 14 khan zunthlum natna dona ni, World Diabetes Day a ni a, he ni pual hian Aizawlah pawh IPR Auditorium-ah hun hman niin, National Health Mission (NHM) mission director leh Hospital & Medical Education director Dr K Lalbiakzuala khuallian a ni.

Dr K Lalbiakzuala chuan, natna inkai chhâwn theih loh, non commu-nicable disease (NCD) - cancer, zunthlum, thisen sang leh lung natnate chu mihringin a insiam chawp a ni fo tih a sawi a, "Hetiang laka fihlim tur hian kan nun dan leh khawsak phung kan thlak danglam a hun tawh tak zet a ni," a ti.

World Diabetes Day hmannaah hian NCD-a state nodal officer Dr Eric Zomawia'n NCD natna chi hrang hrangte leh a inven dante a sawifiah a; Mizoram Diabetic Society president T Saikunga pawhin thu a sawi.

National Programme for Prevention and Control of Cancer, Diabetes, Cardiovascular diseases and Stroke (NPCDCS)-a epidemiologist Dr Lal-ruatdiki Chawngthu-in NPCDCS chungchang a sawi a; NPPCD consultant Dr Lalthanmawii Khal-thang-in bengngawnna thlen theih dan leh a inven dante a sawi bawk.

Inkhawma tarlan danin, WHO-in a chhinchhiah dan chuan, khawvela mihring zawng zawng zinga 8.3%-in zunthlum (diabetes) an veia chhut a ni a, zunthlum vangin kum tin mi nuai 15 vel an thi ziah. Mizoram mihring zawng zawng zinga 5.7% velin zunthlum an vei anga chhût a ni, khawpuiah 8% vel leh thingtlangah 3% velin an vei anga ngaih a ni.

Kumina World Diabetes Day thupui chu 'Eyes on Diabetes’ tih a ni a, Kolasib district-ah pawh hman a ni.