Aizawla ropeway siam dan tur sawiho

Urban Development and Poverty Alleviation (UDPA) minister Zodintluanga leh rope-way siamtu company Doppel-mayr Garaventa Group India Pvt. Ltd. hotute chuan, nimin khan minister pisaah Aizawla ropeway siam dan tur an sawiho.

UDPA Minister chuan, ADB kaltlanga ropeway project an buaipui tih sawiin, Doppelmayr Garaventa-te an lo lang leh chu Mizoram tan malsawmna a nih thu a sawi a, "Mizoram sorkar leh Doppelmayr hian kan kalpui thei dawn a nih chuan ADB kaltlanga kan sum mamawh tur pawh ennawn a ngai dawn. Engti zawng pawhin kalpui ila, ADB sum hmanga kan tih theih pawhin, Doppelmayr kaltlanga kan tih theih pawhin, kan tan chuan thil ṭha tak a ni ve ve," a ti. Ropeway siam a nih theih nan sorkarin theihtawp a chhuah tur thu a sawi.

Thu dawn danin, Aizawl khawpui tâwt leh mipui veivahna awlsam zawk nan UDPA department chuan ngaihtuahna a seng ṭhin a, sorkar laipuia Ministry of Urban Development bultumin Asian Development Bank (ADB) pawhin Mizoram sorkar chu report, '8765 IND: Supporting Sustainable Urban Transport in Aizawl City' tih a siamsak tawh.

Technical assistance report hmang hian UDPA chuan ADB sumin Ministry of Urban Development remtihnain Mizoram sorkar External Aided Project zinga telh turin a buatsaih mek a; survey report chu ADB consultant CDM Smith siam a ni.

Ruahman chhinnaah chuan, Ṭhuampui - Solomon’s Temple (km. 5.5), Ṭhuampui - Chief Minis-ter's Office (km. 2.4) leh Durtlang - Zemabawk (km. 7.5)-te a tel.

Aizawla ropeway siam a nih theih nan hian khawvela ropeway siamnaa hna tam tak lo thawk tawh, Doppelmayr Garaventa Group, India Pvt.Ltd. chuan thla khat vel kal ta khan UDPA minister Zodintluanga hnenah an company leh an hnathawh dante an lo hrilhfiah tawh a; nimin khan Minister hoin a pisaah Aizawla ropeway siam theih dan tur an sawiho leh a ni.

Doppelmayr Garaventa Group hian ram hrang 90 chuangah ropeway an siam tawh a, ropeway siamna hmun, a hralhna leh service pek theihna ram 35 chuangah an nei mek. Aizawla ropeway siamna tur rawtna an siamah hian, senso zawng zawng chu anmahni'n an tum vek ang a, an siam zawhah Mizoram sorkarin ngaihhnathiamna hun kum 22 chhung vel a pe ang a, Mizoram sorkar sum tel loa siam leh enkawl an tum thei a ni.

Meeting-ah hian UDPA secretary Dr CVanlalramsanga leh UDPA officer dangte an tel a ni.