Hâlpuah/hâlmawi khap ni mah se, Kum thar lawm nan an hâl nasa

Nizan kha kum hlui 2020 thlahna leh kum thar 2021 lawm zan a ni a; Mizoram pumah hàlpuah leh hâlmawi hâl leh meithallàwn chhuahte khap ni mah se, Aizawlah chuan an hâl nasa hle.

Hetih lai hian, nimin tlai lam thleng khan hunpuia sorkarin khapna thupek a chhuah bawhchhia police-in  mi panga an man tawh a, mi pali thubuai an siamsak tawh a ni.

Nizana Vanglaini palaiin Aizawl khawpui an fan kualnaah, zan lamah curfew a nih avangin Aizawk khawpui chhung tlangdung kawngpui bikah chuan chhuakvâk an tlem hle a, lirthei tlân pawh a tlém hle. Police duty-te pawhin khawlaia chhuak an tam lo a, tlem azawng chauh an chhuak tih an sawi.

Zanlai rîk hma deuh aṭanga zanlai pelh hnu thlengin kum hlui 2020 thlahna leh kum thar 2021 lawm nan Aizawl khawpui chhung hmun tinah hâlpuah/hâlmawi hàl hmuh tur a awm a, khawpui chhung hmun tinah thâwm a ṭha hle thung.

Krismas leh kum thar hunpuiah hâlpuah, hâlmawi, meithallâwn leh silai lem (a mu nei chi)-te chu Home Minister hoa sorkar hotute ṭhukhawm chuan Mizorama lâk luh, zawrh, lei, hâl leh hmante khap an rêl a; an thutlukna ang chuan district tina magistrate-te'n khapna thupek an lo chhuah tawh a ni.

Home department pawhin hunpui laia khap thilte hi khauh taka kenkawh a nih tur thu te, thupek bawhchhiahte chu dan anga hrem an nih tur thu an lo tarlang tawh ṭhin bawk.