Bána Kaih policy hi rim taka thawkte dinchhuahna tur a ni – Lalthansanga

Aizawl DC pisa chuan nimin khan Dawrpui Multi­­purpose Hall-ah Aizawl district-a Bána Kaih hnuaia Chief Ministers’ Special Package dawng turte tan thil pawi­mawh inhrilhfiahna an buat­­­­­saih a; khuallian minister Lalthansanga chuan, Bána Kaih policy chu rim taka thawkte din­­­chhuah­na tur a nih thu a sawi.

CM's Special Package dawng tur hi Aizawl district-ah department 11 hnuaiah mi 467 an awm a; Special Package-a progress partner tamna ber district a ni.

Minister Lalthansanga chuan, ZPM-in kut hnathawktute'n an thawhrim rah an seng theih nan hma an lak tur thu an sawi ṭhin tih sawiin, "Tunah hian kut hnathawktute tan zalenna dâr vuak a ni ta a, hmun hrang hranga kut hnathawktute'n an thawhrim rah an seng mek. Bána Kaih policy hi rim taka thawkte tana dinchhuahna tur a ni," a ti.

Sem policy-in ram a tihchhiat thu sawiin Minister chuan, "Sem policy hian mipui rilru hruai sualin, kuttlingloa sum lâk duhna kan neih phah em aw a tih theih. Chumi saltànna lak aṭanga kan chhuah theih nan leh thawhrimna hian malsawmna a keng tel," a ti a; rim taka thawh leh rinawmnain hlawhtlinna a thlen a ni tih mipuiin an hriat theih nan hma an lak thu a sawi.

Lalthansanga chuan, ṭanpuina pek turte chu beneficiary ti loin, 'hmasawnna tura thawhpui' (progress partner) tia an sawi thu sawiin, sorkarin ngun taka a vil zui dawn thu a sawi a, "Sorkarin ngun takin a vil zui dawn che u a, tih mai mai a rem ve dawn lo. Sorkarin a ring ngam che u a, nangni pawhin min ring ngam ve tur a ni," a ti a; rinawm taka thawk tur leh an scheme thlante hlawhtlinpui ngei turin a chah.

Minister Lalthansanga chuan, sorkarna an siam tirhah year of consolidation an hmang nghal tih sawiin, "Sawiselna hrang hrang pawh kan tawk nual. Mipuite'n kan lakah beiseina sang tak an nei a, opposition phei chuan min khamkhawp lo em em. Chhel takin kan tuar a, tunah chuan hma kan la thei tawh a, kan policy-te a tam thei ang ber tihhlawhtlin theih nan chak takin hma kan la dawn a ni," a ti.

Inhrilhfiahna inkhawmah hian Plan-ning research officer C Lalnghakliana'n Special Package chungchang leh a kaihhnawih thil pawimawh a sawifiah. Mizoram Start-up Mission programme manager Samuel Vanremruata'n 'Introduction to Entre-prenuership & Bussiness Management' tih thupui a sawi a, SBI manager Lalchawimawia Sailo-in 'Basic book keeping' tih a sawi bawk.