Taksain a mamawh chin chauh ei in kan zir a pawimawh - Rinpuii

Health & Family Welfare minister Lalrinpuii chuan nimin khan IPR Auditorium-ah Mizoram Diabetics Society (MDS) Annual General Meeting vawi 14-na a hmanpui. Minister chuan, zunthlum (diabetes) leh a kaihhnawih natnate'n Mizote a tihbuai nasat thu a sawi.

Lalrinpuii chuan, Mizote chu hnam ang pawha ei leh in ngaina, nunphung uluk tâwk loh vanga zunthlum leh a kaihhnawih natnate'n a tihbuai nasat a nih thu a sawi a, "Hemi laka fihlim tur kan taksain a mamawh chin chauh thil ei in kan zir te, insawizawi uarte hi thil pawimawh a ni. Upa lam bakah, nunphung uluk tawk loh avanga kum naupang lam thlenga thau luatna (child obesity) a hluar chho tawh hle," a ti.

Inkhawm hi MDS vice president Dr Eric Zomawia'n a kaihruai a, MDS president T Saikunga'n thu a sawi bakah zunthlum leh a kaihhnawih natna chungchanga hriattur pawimawh hrang hrangte zirhona neih a ni a; chawhnu lamah free clinic buatsaih a ni bawk.