KHAWTHLIR

Rakzu lt. 41,222 END-in man tawh

Excise & Narcotics department chuan kumin 2025 chhungin rakzu litre 41,222 an man tawh a, zu bilh lai ṭín 79,444 an tichhe tawh bawk. END chuan, tun hnaiah dan bawhchhiaa zu siamna hmun an dap ṭhin a, zu bilh lai leh zu siam sa tam tham tak an tichhia tih an tarlang.

Khâmah tla hlum

July 23, Nilaini chawhnu dar 2:30 vel khan Bawngkawn-Sairang kawng, Chaltlang Lily Veng chhunga khâmah Lalruattluanga (19) s/o Vanlalpianga, Vaikhawtlang a tla hlum. Lalruattluanga hi a ruang lak chhuah a nihin tu nge a nih hriat a ni mai lo a, nimin zing dar 8 vel khan a chhungte'n Lalruattluanga a ni tih an finfiah. Bawngkawn South-ah a unaute nena khawsa a ni a, nimin khan a ruang endik a nih hnuah an khua panpui a ni.

CM-in lawmthu sawi

Chief minister Lalduhoma chuan, NHIDCL, Mizoram Regional Office-a executive director atana Adelbert Susngi dah thar a nih avangin prime minister Narendra Modi leh Road Transport and Highways minister Nitin Gadkari chungah a lawm thu a sawi. CM hian Mizoramah Adelbert Susngi dah turin a lo dil tawh a ni.

MLA-in lawmpui

Government deputy chief whip W Chhuanawma chuan nimin khan a pisaah a bial Tuichang mi, kumina Mizoram University under graduate exam-a ti ṭha mi pahnih hnenah lawmpuina a hlan. Lawmpuina hlante hi Zaithanmawii, New Chalrang, BA (History)-a pariatna leh Vanlalchhuangi, Khawhai, BA (Education)-a pariatna an ni a; MLA hian lawmpuina atan thuchei, laptop leh pawisa a hlan a ni.

MSU leh MLA

Mizo Students' Union Gen. Hqrs hruaitute chuan nimin khan Lunglei North bialtu MLA V Malsawmtluanga an hmu a, October 8-10, 2025 chhunga Hnahthiala MSU General Conference neih tur chungchang an sawipui. V Malsawmtluanga chuan, MSU General Conference neih turah theihtawp chhuahpui a tum thu MSU hruaitute a hrilh.