PMAY (Urban) & ASHA - India Award Mizoramin award pathum a dawng

Sorkar laipuia Ministry of Housing & Urban Affiars hnuaia kalpui, PMAY (Urban) & ASHA - India Awards-ah Lunglei, Kolasib leh Lawngtlai district-te'n nimin khan chawimawina (award) an dawng.

Sorkar thuchhuah tarlan danin, Ministry of Housing & Urban Affiars buatsaihin nimin khan ram pum huap Light House project lungphùm phùmna leh PMAY (Urban) & ASHA - India Awards semna hun, video conference kaltlangin hman a ni.

Award semna hun hi prime minister Narendra Modi-a'n a hmanpui a; Housing & Urban Affairs changtu minister of state Hardeep Singh Puri te, Andhra Pradesh, Tripura, Jharkhand, Uttar Pradesh, Madhya Pradesh, Gujarat leh Tamil Nadu state chief minister-te leh state tin aiawh sorkar official-te an tel bawk. 

PMAY (Urban) hi khawpuia chêng, mahni in la nei lote in sak ṭanpuina scheme a ni a, a hnuaiah lawmman dawn theih chi hrang paruk a awm. Award-te chu - Best Performing State, Best Performing Municipal Corporation, Best Performing Municipal Council, Best Performing Nagar Panchayat, Beneficiary Award for Best House Construction leh Special Award for Best Practices and Innovation-te a ni.

Award hrang hrangah hian lawmman pakhatna, pahnihna leh pathumna a awm zel a; a hrangin ‘North East Region & Hilly States Category aṭangin award dawng tur thlan a ni bawk.

Nimina award semnaah hian Mizoramin award pali a dawng a; pathum chu mimal dawn a ni a, pakhat chu Lawngtlai khuain a dawn niin, chu chu Best Performing Nagar Panchayat (NER & Hilly States Category)-a pahnihna lawmman a ni.

Mimal lawmman dawnte chu Best House Construction Award (mimal in sa ṭha)-te an ni a, India ram puma award dawngtu mi 88 zinga Mizoram aṭangin mi pathum an tel. Mi pathumte chu - RK Lianzuala leh VL Thanpuii te nupa, Kolasib Saidan, Rothanmawii, Rengtekawn leh P Lalhmachhuana leh Lalhmangaihzuali te nupa, Lunglei Salem Vengte an ni.

Best Performing Nagar Panchayat chu Lawngtlai district aiawhin NULM district project officer V Lalruatliana, SDO (Sadar)-in video conference kaltlangin a dawng a; Best House Construction Award chu an awmna district official-te'n an dawng thung.