Bána Kaiha loan la turin mi 646 thlang; CM's Special Package dawng tur 2,257

Minister, MLA leh AMC corporator-te pualin nimin khan Planning conference hall-ah Bána Kaih (Handholding) scheme zirhona 'Leader-ship Sensitization Workshop' buatsaih a ni a; Bána Kaih hnuaia loan la tur mi 646 leh CM's Special Package dawng tur mi 2,257 thlan a nih thu tarlan a ni.

Workshop hi Mizoram State Policy Coordination Committee (MSPCC) vice chairman Dr KC Lalmalsawmzauva'n a kaihruai a; MSPCC member secretary Lalmalsawma Pachuau, Planning secretary-in Handholding scheme hnuaia hmalakna awm tawhte tarlangin, CM's Special Package dawng tur mi 2,257 leh loan la tur mi 646 thlan a nih tawh thu a sawi.

MSPMC member LP Lalchangkima'n Bána Kaih scheme a sawifiah a, sawiho zui a ni. Bána Kaih hnuaia CM's Special Package dawng tura thlante hnenah July 2025 chhungin ṭanpuina sem zawh vek tum a nih thu leh, loan component pawh dilna hawn leh thuai tum a nih thu tarlan a ni.

Bána Kaih scheme hnuaia loan hrang hrangte chu loan scheme awm sate ni mah se, scheme awm saah hian dahkham tur an neih loh vang te, a pung rulh huphurh ṭhin vangtein mi tam takin loan an lak ngam loh phah ṭhin thu sawi a ni a; Bána Kaih scheme hmangin Mizoram sorkarin loan pung rulh ngai lo leh dahkham tur pawh tumsakin, mamawhtute tan loan laksak a nih dawn thu tarlan a ni bawk.