COVID-19: Mizoram dinhmun Hripui vei 12 hmuh belh a ni

December 31, Ningani khan Mizoramah Covid-19 vei mi 12 hmuh chhuah a ni a, an zingah natna (Covid-19 symptom) lang mi pahnih leh Mizoram chhunga kái mi pahnih an awm. Nimin khan hripui laka fihlim tawh mi pahnih chhuahtir an ni thung.

Covid-19 vei hmuh chhuah tharte chu mipa vek an ni a; ZMC laboratory-a hmuh mi pali, TrueNAT-PCR hmanga hmuh mi pasarih leh Rapid Antigen Test (RAT) hmanga hmuh mi pakhat an ni.

Decemvber 31 khan Mizoramah swab sample 926 endik a ni a, ZMC laboratory-ah mi 574, TrueNAT-PCR hmangin district paliah mi 85 leh RAT hmangin district pariatah mi 267 endik a ni. Hripui vei mi 12 hmuhte chu sample endik zat aṭangin 1.30% a tling.

Sorkar thuchhuah tarlan danin, ZMC laboratory-a hmuh chhuah mi pali chu mipa vek, Aizawl district-a swab sample lâkte an ni a; hnam dang, state páwn aṭanga rawn lut vek niin, an zingah symptom nei an awm lo.

TrueNAT-PCR hmanga hmuh chhuah mi pasarihte pawh mipa vek an ni a, an zinga paruk chu state páwn aṭanga tun hnaia rawn lut an nih laiin, mi pakhat chu tualchhunga hri kái a ni. RAT hmanga hmuh chhuah chu mipa kum 49, hri kai ṭanna hriat loh leh symptom nei a ni.

Nimin khan Covid-19 laka fihlîm tawh mi pahnih chhuahtir an ni a, SRH-ZMC-a enkawl lai ve ve an ni.

Mizorama Covid-19 vei mi 4,216 hmuh chhuah tawhte chu mipa 3,100 leh hmeichhia 1,116 an ni a; nimin tlai dar 5 thleng khan damin mi 4,100 (97.25%) chhuahtir an ni tawh a, mi pariat (0.19%) thi tawhin, enkawl mek mi 108 (2.56%) an awm.

December 31 thleng khan Mizoramah swab sample 1,80,520 endik tawh a ni a, chu'ng aṭanga Covid-19 positive hmuh chhuah tawh 4,216 chu 2.33% a ni.

Mizorama Covid-19 positive hmuh chhuah tawh mi 4,216 zinga mi 1,996 chu Mizoram chhunga kái an ni a, mi 2,220 chu state páwn aṭanga rawn lût an ni.

ZMC-a hmuh chhuahte:

Sipai - 1: Sipai (army) mipa kum 45, 457 Field Hospital, Ṭhuampuia awm, tun hnaia Rajasthan aṭanga rawn lut, quarantine facility-a khung hran mek.

CRPF - 2: Central Reserve Police Force-a mipa kum 28 & 30, Guwahati aṭanga rawn lut, quarantine facility-a awm lai.

SIB Complex, Tuikual - 1: SIB mi leh sa mipa kum 28, tun hnaia Bihar aṭanga rawn lut, quarantine facility-a awm mek.

TrueNAT-PCR hmanga hmuh:

BSF, Lunglei - 5: Lunglei Zotlanga 199 Bn BSF sipai kum 27, 31, 32, 33 & 38; tun hnaia West Bengal aṭanga rawn lut, quarantine facility-a awm mek, symptom nei lo vek.

Lunglei Ramthar Veng - 1: Mipa kum 25, cement mistiri; Lunglei Civil Hospital casualty-a inentira kal, admit nghal a ni. Tualchhunga hri kái, kàina hriat loh, symptom nei.

Kolasib Tuiṭha Veng - 1: Mipa kum 26, Jammu & Kashmir aṭanga rawn lut, quarantine facility-a awm mek, symptom nei lo.

RAT hmanga hmuh:

Rangvamual - 1: Mipa kum 49, Aizawla private hospital pakhata inentir tura kal, screening point-a Covid-19 positive tih hmuh; hri kàina hriat loh, symptom nei.