KHAWTHLIR

Power awm dawn lo

Power & Electricity department chuan vawiin hian hna an thawh dawn avangin zing dar 9 aṭanga tlai dar 4 thleng Aizawl hmun ṭhenkhatah kawlphetha an titawp dawn. Hei vang hian Treasury Square leh Chanmari inkar leh Aizawl chhuahlam veng hrang hrangin kawlphetha an hmu dawn lo.

Kawngpui khâr

Vaivakawn aṭanga Bazar Bungkawn panna kawngah tuichhe paihna pipe phûm a nih avangin July 24, 2025 aṭang khan zan dar 9 aṭanga zing dar 5 thlengin kawngpui khar ṭhin a ni a; hna thawh zawh hma chu zan lamah kawng khar ṭhin a ni dawn tih Aizawl Traffic SP-in a tarlang.

Vaihlo zawrh khap

Aizawl DC Lalhriatpuia chuan thupek a tichhuak a; The Prohibition of Electronic Cigarettes (Production, Manufacture, Import, Export, Transport, Sale, Distribution, Storage and Advertisement) Act, 2019 hnuaiah zirna-in aṭanga yard 100 (ft. 300) huam chhungah vaihlo aṭanga thil siamte leh e-cigarette zawrh khap a nih thu a tarlang.

Chhiah lak theih

State Tax deputy commissioner (Kolasib Zone) H Vanlalsanga chuan hriattirna a tichhuak a; The Mizoram Goods and Services Tax Act, 2017-in a sawi angin mela, concert, sports tournament, movie (film) chhuah, trade fair, etc., man nei emaw, ticket siam emawa buatsaihte chu Supply of Service hnuaiah a luh avangin chhiah (tax) lak theihna a nih thu a puang.

Hnathawh thlir lêt

Animal Husbandry & Veterinary department chuan nimin khan Mizoram State Veterinary Council hall-ah an hmalakna leh hnathawh thlir letna, review meeting an nei a; Directorate leh district hrang hrang aṭangin officer 33 an tel. Ṭhutkhawm hi director Dr R Zothanmawii'n a kaihruai a, secretary Lalsangliana'n a telpui. Mizoram AH&Vety Service post 115 a awm a, post 69 hnawhkhah a ni.