Hindi zirna chungchang sawiho a ni

Mizoram Education Reforms Committee (MERC) chuan nimin khan School Education Directorate conference hall-ah sikula Hindi zirna kalpui danah inràwnkhawmna a buatsaih. Mizorama middle school leh high school-ah Hindi zirtirtu 1,393 an awm mek thu leh 855 chu a nghet lo (contract) an nih thu tarlan a ni.

Inrawnkhawmnaah hian School Education department officer te, MBSE, SCERT leh Samagra Shiksha aiawh te, MERC member te, Hindi zirna hmun hrang hranga hotu te, Hindi Education officer te, Hindi Teachers Association hruaitute leh zirlai pawl hruaitute an tel.

Education consultant Rev. Dr K Thanzauva chuan, Mizorama M/S leh H/S hrang hrangah Hindi zirtirtu 1,393 an awm mek thu sawiin, "Hindi zirtirtute hi regular 538 leh contract 855 an ni a, H/S-ah 440 leh M/S-ah 953 an thawk mek," a ti a, Mizo zirlaite'n Hindi chu an zir nêp avangin an thiam tak tak lo nia a hriat thu a sawi.

Rev. Dr K Thanzauva chuan, inràwnkhawmna buatsaih chhan chu - Mizo zirlaite Hindi-a ṭha taka an ṭawng theih tur ngaihtuah a nih thu sawiin, "India rama awm kan nih avangin Hindi hi official language a ni si a, kan thiam ngei a ṭul," a ti.

School Education director Angela Zothanpuii chuan, Mizoram páwnah Hindi pawimawhna a lang chiang ṭhin tih sawiin, "Sikul ṭha tak takah Mizo naupangte an kal hian an buai ṭhin a, puitling pawh Hindi thiam lo chu hnam dang zingah kan buai ṭhin. Kan Hindi zir dan hi insiamṭhat ṭulna a tam," a ti a, inrawnkhawm chu a pawimawh thu a sawi.

MERC working chairman Prof. Lalbiakdiki Hnamte chuan, Mizorama Hindi inzirtir danin a thlen chin te, duhthusam lohna lai leh hmasawn tura ṭan lak a ngaihnate a sawi bawk.