College-te'n freshers' social an hmang

Nimin khan T Romana College-in Fresher's Social & Graduation Day an hmang a, Higher & Technical Education minister Dr Vanlalthlana'n a hmanpui. Hnahthial College pawhin nimin khan Freshers' Social leh Graduation Day an hmang a, bialtu MLA Jeje Lalpekhlua'n a hmanpui.

Dr Vanlalthlana hian T Romana College annual magazine 'Raltiang' a tlangzarh a; thu sawiin, "College hi zirna ngawr ngawr piah lamah thil dang tam tak zir belhna hmun a ni tel," a ti a; HTE Minister a nihna angin zirna hmasawn nan huaisen takin theihtawp a chhuah zel tur thu a sawi.

T Romana College hi kum 1992-ah din a ni a, tunah zirlai 1,066 an nei mek. Kumin 2025-ah hian an zirlai 295-in BA an zo a ni.

Hnahthial College Fresher's Social & Graduation Day hman­puitu Jeje Lalpekhlua chuan, Mizoram University Under Graduate Exami­nation 2025-ah Hnahthial College zirlaite an hlawhtling vek chu a lawm tak zet thu a sawi.

South Tuipui bialtu MLA chuan, zirlaite chu ṭha taka pass ringawt lo a, hman tlak leh chhawr tlak nih tum turin a chah a, "Nungchang ṭha tak neih tum ṭheuh rawh u. Ruih theih thil, zûk leh hmuam lakah fihlim tum tlat u la, lehkha thiam hman tlak loh nih ai chuan lehkha zir taima, mi hman tlak an hlawh­tling zawk a ni," a ti.