Champhai dist-ah July 2025-ah ruihhlo vangin mi 37 man tawh

Champhai district-ah kumin July thlaah nimin thleng khan Police leh Excise & Narcotics department duty-te'n ruihhlo tawlhrûk vangin mi 37 an man.

Champhai District Narco Coordination Centre Committee (NCORD) chu nimin khan chairman Mohammad Aaquib, bawrhsap hoin an ṭhukhawm a, ruihhlo donaa hmalaknate an thlirho. Bawrhsap chuan, Champhai district chu ramri hrûla awm a nih avangin ruihhlo doah ṭan mar reng a ṭul thu sawiin, theihtawp chhuah zel turin Police leh END te a chah.

Ṭhutkhawma tarlan danin, July 1-25, 2025 chhungin Police leh END mi leh sate'n ruihhlo kaihhnawiah mi 37 an man a, an vaiin heroin leh methamphetamine tawlhrûk vanga man vek an ni.

Ni 25 chhung hian Champhai police-te'n heroin kg. 7.855 leh meth kg. 78.95 an man a, Rs 12,62,00,079 man hûa chhût a ni. Heroin leh meth man kaihhnawihah thubuai pariat ziak lutin, mi 17 an man a; ruihhlo phurhna two wheeler pahnih, car pathum leh 709 truck pakhat an man bawk.

Excise & Narcotics department chuan July thla ni 25 chhungin heroin kg. 1.559 leh meth kg. 11.21 an man a, mi 15 manin, thubuai 12 an ziak lut a ni.