Chhiatna tuarte hnenah ṭanpuina sem

Aizawl West-II bialtu MLA Lalnghinglova Hmar, minister of state chuan Mission Foundation Movement (MFM)-in Vaivakawna khuarel chhiatna vanga harsatna tâwk chhungkaw 35 hnena chhawmdawlna an pekte nimin khan a sem.

Lalnghinglova Hmar chuan, Mizoram sorkar sum la hêk lo zawnga corporate social responsibility (CSR) hmang ṭangkai thei pawl an awm ṭhin chu a ṭha a, CSR dil chhuak thei pawl pung zel se a duh thu a sawi a, "MFM-in sorkar laipui, CSR leh foreign project hmanga hna an thawk ṭhin hi a ropui. Mizote'n CSR leh foreign fund-te hai chhuah kawngah hma kan sawn zel a ṭul," a ti.

Chhawmdawlna hi HT Parekh Foundation, Mumbai-in CSR aṭanga an pek, MFM-in an dil chhuah a ni a; Vaivakawna chhiat tâwkte chhungkaw 30 hnenah alu, buhfai leh dailuah ip khat ṭheuh pek niin, chhungkaw panga hnenah tui litre 1,500 dawng tuizêm pakhat ṭheuh pek a ni.