Covid-19 vei mi 3 ICU-ah enkawl

State Referal Hospital (SRH)-ah nimin khan Covid-19 vei mi pahnih dah luh an ni a, anni nen mi 21 awm mekin, chu'ng zinga pathum chu ICU-ah enkawl an ni. Nimin khan hripui laka fihlim tawh mi pahnih chhuahtir an ni thung.

SRH-ZMC Bulletin tarlan danin, SRH-a Covid-19 vei vanga enkawl mek mi 21 zingah kum 60 chung lam mi pali leh naupang kum 14 hnuai lam mi pathum an tel.

SRH ICU-a Covid-19 vei enkawl mek mi pathum zinga pakhat chu ventilator hmantir a ni a, mi dang pahnih pawh oxygen pek an ni. Isolation ward-ah mi 18 an awm a, an zinga panga chu oxygen pek an ni bawk.

Hetih lai hian, ZMC laboratory-ah nimin khan swab sample endik a awm lo a, kum thar ni a nih avangin an chàwl nia thu dawn a ni.