KHAWTHLIR

Faina lawmman dawn lawm dawn

Lunglei Municipal Council hnuaia Municipal Sanitation Committee chu an chairman K Lalrinawma, LMC vice chairman kaihhruaiin tun hnai khan an ṭhukhawm a; Lunglei khawpuiin Swachh Survekshan Award 2024-25 a 'Promising Swachh Shehar of Mizoram Award' a dawn chu July 30, 2025-ah lawm an rel. Award dawn lawmnaah hian sanitation worker te, bawlhhlawh paih lirthei khalhtu leh bawlhhlawh khawntu te, local council tin huam chhunga faina kawnga thawh hlawk mimal chawimawi phute hnenah chawimawina hlan an rel bawk.

Miniser-in tlawh

Agriculture and Farmers' Welfare minister PC Vanlalruata chuan July 25, 2025 khan Hnahthial district-a AFW department hnuaia office hrang hrang - District Agriculture Office, School of Agricultural Sciences leh Krishi Vigyan Kendra te a tlawh. Minister chuan, "Thiamna sang zawk leh hmanraw ṭha zawk hmanga lo neih a ṭul tawh a, kut hnathawktute leh an thlai thar hralhna hi thlun zawm kan tum," a ti.

Faina hnatlangpui

Electric Veng Branch YMA chuan UDPA, AMC, Aizawl Smart City leh Central YMA ṭangho buatsaih Aizawla Faina Intihsiak kal mek pualin July 26, Inrinni khan an vengah Faina Hnatlangpui an ko a, YMA member leh YMA chhang mi 800 vel an thawk chhuak. Hnatlangte chu AMC hotuten an tlawh a, Aizawl mayor Lalrinenga Sailo-in Rs 20,000 a pe a, executive corporator Laltlanzova Khiangte leh AMC official-te'n an ṭawiawm a ni.

Training buatsaih

Kolasib district-a Bána Kaih (Handholding) scheme hnuaia Chief Minister’s Special Package dawng tur mi 143 pualin IPR Hall-ah Orientation Training buatsaih a ni a, mithiamte'n thil pawimawhte an hrilhfiah. Kolasib district-ah hian CM Special Package dawng tur - Commerce & Industries department hnuaiah mi 47, AH&Vety hnuaiah mi 33, Horticulture hnuaiah mi 23, LRSWC hnuaiah mi 18, Fisheries hnuaiah mi 12, Agriculture hnuaiah mi pakua leh Sericulture hnuaiah mi pakhat an awm a ni.