Kolasib dist-a HIV+ve hmuh zingah homosexual/bisexual mi 5 an tel

Kolasib district-ah April 2024 - June 2025 chhungin HIV vei mi 110 hmuh chhuah a ni a, mipat hmeichhiatna aṭanga kai an tam ber. HIV vei hmuh thar zingah anpui kawp/mipa leh hmeichhia kawp thei (homosexual/bisexual) panga an tel.

Kolasib District AIDS Prevention and Control Committee (DAPCC) chu additional DC B Malsawmtluangi hoin tun hnai khan an ṭhukhawm a; tarlan danin, April 2024 aṭanga kumin June thla thlengin Kolasib district-ah HIV vei mi 110 hmuh chhuah niin, chung zinga 81.81% chu mipat hmeichhiatna aṭanga kai an ni.

Hriau inhman ṭâwm aṭanga kai 16.36%, nu aṭanga kai 1.81% an awm a; mahni anpui kawp/mipa leh hmeichhia kawp thei mi panga an awm bawk. Kolasib district-ah AIDS vei mek ART la mi 1,310 an awm.

B Malsawmtluangi chuan, HIV/AIDS leh a kaihhnawih natnate donaah Kolasib district-in theihtawp an chhuah thu a sawi a, "AIDS vei an pun zel loh nan leh vei mekte pawh ina inenkawlna ART-te kim taka an lak theihna turin tun aia chak lehzuala kan thawh a ṭul," a ti.

Ṭhutkhawmah hian Red Ribbon Quiz Competition neih tur te, District Community Resource Group leh Integrated Health Campaign chungchangte an rel a ni.