Aspirational Block - Lungsen Block-ah damdawi-ina nau hring an pung nasa

Aspirational Block Programme leh Project Better Living through Outreach, Optimal Maternal & Child Health (BLOOM) hnuaia Lungsen Aspirational Block chhunga nu leh naupang hriselna atana hmalakna kaltlangin naupiang zat aṭanga chhûta damdawi-ina nau nei zat chu June-July 2025-ah 72.2% a kai a, a san ber ṭum a ni.

Sorkar thuchhuah tarlan danin, Lungsen RD Block chhunga damdawi-ina nau nei (institutional delivery) zat chu March 2023-ah 14.73% a ni a, Aspirational Block Programme hnuaia hmalak hnu March 2025-chuan ah 43.14%-ah a kai. June 2025-a Project BLOOM kalpui hnuah hmasawnna a awm bekh a, June-July 2025-ah chuan 72.2%-ah a kai chho a ni.

Project BLOOM hnuaiah hian nu naupaiin damdawi-in ngeiah nau a neih theih nana inzirtirna te, a thlawna koh mai theih tur lirthei - Safe Womb Wheel ruahman te, nau nei tur leh buaipuitute lo chawlh lailawkna khualbuk (waiting room) siam te, naupai aṭanga thla thum chhunga inziak lut (register)-te hnena 'BLOOM Gift Basket' pekte leh hmalakna hrang hrang a awm.

Nau paite enkawlna leh chaw ṭha a hun taka an dawn theih nana nau pai aṭanga thla thum chhunga inziah luh (antenatal care – ANC registration)-ah pawh nasa taka hmasawn a ni a; inziak lut zat March 2023-ah 50.6% a nih laiin, June-July 2025-ah chuan 65.38% a tling tawh a ni.