Kargil Vijay Diwas pualin hun hmang

July 26, Inrinni kha kum 1999-a Kargil indona (Kargil War)-a India-in Pakistan a hneh champha, 'Kargil Vijay Diwas' a ni a; BJP Mizoram Pradesh chuan Aizawla an pisaa an hman bakah, Assam Rifles hmuin chhuahsan taka War Memorial-ah ram tana nunna hlantute hriatreng nan pangpar an dah.

BJP pisaa Kargil Vijay Diwas hmannaah Palak bialtu MLA K Hrahmo chuan, Kargil War-ah India sipai huaisente tawrhchhelna, tumruhna leh huaisenna avangin India-in Pakistan a hneh thei tih a sawi a, "Kargil War hian India chu khawvel hriatah a ropuizia a tarlang. India hmalakna fing tak avangin khawvel pawhin India an hmuh dan a dang ta a ni," a ti.

K Hrahmo chuan, kum 1999-a Kargil indo laiin Israel-in India ram a puih nasat thu sawiin, "Israel-in min puihna avangin Kargil War-ah khan kan chak a tih theih awm e," a ti a; India sipaite hriatreng a ṭul thu leh sipaite zahnaah ṭhanharh a ṭul thu a sawi.

Tunah chuan India ram ropuizia khawvelin a hre tawh nia sawiin K Hrahmo chuan, "Pakistan nena inkhaikhin theih loh khawpin kan inthlau tawh. Mizoram mipui pawh India rama kan awm hi kan vannei hle a, lawm nachâng kan hriat pawh a ngai. India ram hausakna chhawr ve turin Mizoram mipui kan inbuatsaih a, kan ngaihtuahna kan sen a ngai a ni," a ti.