Thawnthu insawisiak buatsaih mek zel

July 25, 2025 khan Aizawlah thawnthu tawi insawisiakna, District Level Story Telling Competition zawh a ni a; Siahaah pawh DRDO Conference Hall buatsaih a ni bawk.

Aizawl district tana intihsiakah hian Grace Lalrinpari Hauzel, Pachhunga University College chu pakhatna niin, PC Lalruatdika, Sialsûk chu pahnihna a ni a; an pahnih hian Mizoram pum intihsiakah Aizawl district aiawhin an tel ang.

Aizawl district-a intihsiakah hian mi 16 an tel a; Aizawl district-a hmun lâr leh tlawh hlawh paruk - Sailam, Lungleng Lal In, Phulpui, Sakawrhmuituai Tlang, Hangi Lunglen Tlang leh Sialsuk bakah, Aizawl district-a history nei ṭhate chanchin an insawi ngaihnawmsiak a ni.

Siahaah chuan Siaha district-a hmun langsar zual pasarih - Palak Dil, Mawma tlah, Castle of Beino, Pala Wetland, Tokalo Wildlife Sanctuary, Siata village leh Lorraine Ville, Saikao chanchin insawi ngaihnawmsiak a ni thung.

Pakhatna aṭanga pathumnate'n lawmman an dawng a; pakhatna Zine P Fachhai chu August 8, 2025-a State Level Story Telling Competition-ah Siaha district aiawhin a tel ang.

Tourism department chuan Storytelling Competition hi an buatsaih a; khualzin hîpna atan leh hnam dangte'n Mizoram chanchin an hriat ve theihna atana tih niin, thupui chu 'Narrating Mizoram: Tales of Our Land' tih a ni.