Lunglei Press Club Room thar hawng

Mizoram Journalists' Association (MJA), Lunglei District-in Lunglei Press Club-a Committee Room siam thar leh mimal chenna luah theih tur in an sak chu July 25, 2025 khan Lunglei Municipal Council (LMC) chairman Lalzuithanga'n a hawng.

LMC Chairman chuan, chanchinbumite hna chu eng lai pawha ṭan mar pât ngai, inthlahdah theih loh a nih avangin a hahthlak a, mi nazawng thawh chi a ni lo tih a sawi a, "Lungawi taka ram leh hnam rawngbawlna rilru pua thawk ṭhin chanchinbumite hi an hluin an ngaihsanawm hle a ni," a ti.

Lalzuithanga chuan, social media leh digital media-ah thu thlitfim loh leh ṭangkai lo a tam thu sawiin, "Chutiang karah journalist-te chu media hman dan ṭha leh dik zawk mi dangte kawhhmuh a, fuihtu an ni zel hi a lawmawm," a ti a, beidawng loa ke pên zel turin a chah.

LMC Chairman chuan, LMC hnuaiah a ṭha zawnga Lunglei khawpui siam turin hmalak mek a nih thu leh MGNREGS ngaia lunglen rei lutuk chu hmasawn thei loa mipui uai bettu nia a hriat thu a sawi a; LMC aṭanga rethei leh harsa zawkte chawi kanna tur leh mipui hmasawnna rualkhai a awm thei ang tih beisei chunga LMC hmalakna theihtawpa thlawp turin journalist-te leh mipui a sáwm.

Inkhawm hi Lunglei district MJA president H Lalthansanga'n a kaihruai a, IPRO C Lalhruaitluanga pawhin thu a sawi a ni.