Aug. 1 aṭangin intlân chhâwk kalphung thar

Aizawla lirthei intlân chhâwk dan tihdanglam, intlân chhâwkna tur bik siam chu August 1, 2025-ah kalpui ṭan a ni dawn a, thla khat chhung enchhin phawt a ni ang.

Coordination Com­­mi­ttee on Traffic Mana­gement-in a rêl tawh angin, Aizawla lirthei intlan chhâwk dan tihdanglam enchhin tur chungc­hangah hian Aizawl Traffic SP Ruatsanga Ralte chuan hriattirna a chhuah a; intlân chhâwk enchhin chu August 1-31, 2025 chhung atan a nih thu a tarlang.

Lirthei intlan chhâwk hian mimal, sorkar leh bungraw phur lirtheite a huam a, zing dar 9:30 aṭanga tlai dar 6 thleng a ni ang. Inrinni, Pathianni leh sorkar pisa chawlh ni-ahte chuan intlan chhâwk a ni dawn lo a, lirthei zawng zawng tlan theih a ni.

Intlân chhâwkna tur chu Bawngkawn leh Kulikawn (Tlangnuam panna pengṭhuam) inkar tlangdung kawng­pui (main spine) a ni a, Chaltlang lam leh Ramhlun lam kawng a tel ve ve a, Zarkawt phei leh Lower Zarkawt a tel ve ve. Sikulpuikawn leh Khatla inkar te, Khatla kawn aṭanga AR 23 Sector gate inkar te, Khatla kawn-Zodin Square te, Temple Square-Vaivakawn te a tel bawk.

Lirthei intlan chhâwk­na tura ruahman ni lo zawngah chuan lirthei zawng zawng tlan theih a ni a, hei hian khawpui chhunga luh hun bik nei lirtheite erawh a huam lo.

Taxi, ke pali nei leh ke pahnih neite chu hlawm panga - A, B, C, D leh E-ah ṭhen a ni dawn a, Thawhṭanni - Zirtawpni inkarah ni tin hlawm pakhat zel an tlan dawn lo a ni.