Kum 2023-24 leh 2024-25 ah mi 40,563-in scholarship an dil
Kum 2023-24 financial year-ah khan Mizoram Higher & Technical Education department kaltlangin post matric scholarship leh pre matric scholarship dil mi 40,563 an awm a, scholarship dawng turin mi 35,800 thlan an ni. Kum 2024-25 atan scho' chi hnih dil mi 37,278 an awm.
July 24, Ningania chief minister Lalduhoma hoa Higher & Technical Education department hmalakna leh hnathawhte thlir letnaa tarlan danin, kum 2023-24 khan zirlai 31,652-in post matric tribal scholarship an dil a, chu'ng zinga mi 27,652 chu scho' dawng tura thlan an ni.
Post matric scholarship dawng tura pawm zinga zirlai sing hnih chuang hnenah scho' pek tawh niin, cheng nuai 3,497.69 pek chhuah a ni tawh a; la pek loh mi 4,000 an awm a, Additional Fund hmuh hunah pek tum a ni. Kum 2024-25 atan post matric scholarship diltu zirlai 28,471 an awm.
Kum 2023-24 khan pre matric scholarship zirlai 8,911-in an dil a, scho' dawng turin mi 8,148 thlan a ni. Zirlai sang riat chuang hnenah scho' pek tawh niin, cheng nuai 313.64 sem a ni tawh a; scho' la dawng lo zirlai 763 awmin, Additional Fund hmuh hunah pek tum a ni. Kum 2024-25 ah pre matric scholarship zirlai 8,807-in an dil.