Lalchhuanawma thih thu-ah a nupui Lalremruati a inpuang, a that tih a sawi

Lalchhuanawma (39), Mission Vengthlang chu July 27, Pathianni zing dar 2 vel khan an inah inâwk hlum anga hmuh a ni a; police-in an chhui zuinaah a nupui Lalremruati (35) d/o Zolawmi (Maubawk) chuan a thah a nih thu a sawi.

Lalchhuanawma te nupa hi kum ruk an innei tawh a, fa an nei lo. Maubawkah an awm ṭhin a, thla hnih vel kal ta khan Mission Vengthlangah an insawn. July 26, Inrinni zan khan an nupain zu an in a, Lalchhuanawma chu a rûi a chahthlak hnuah hruiin a hrawkah a rek a, a thih hnuah inâwk hlum anga a dah thu a nupui Lalremruati chuan police a hrilh.

Police aṭanga thu dawn danin, Lalchhuanawma thih thuah hian khaw­tlangin an rinhlelh avangin Kulikawn Police Station hriattir an ni a, police-te chuan a nupui Lalremruati chu thu zawhfiah atan an la a; a pasal chu a reh hlum ngei a nih thu a puang. Nimin khan Central Women Jail-ah dah luh nghal a ni.

Lalchhuanawma thahnaah hian Lalremruati bialpa nia sawi, Lawngtlai district lam mi tlangval kum 28 mi pawh thu zawhfiah atan police-in an la a, ani hi Aizawlah a unaupa nena in luaha khawsa an ni. Tun china chhuinaah chuan Lalchhuanawma thahnaah a inrawlh loa hriat a ni a, police-in an hrêng zui rih lo.

Lalchhuanawma hi lu mêt ṭhin a ni a, a nupui Lalremruati hi sorkarah group-D hna a nghet loa thawk a nia thu dawn a ni.