MINECO-ah mall lian sak tumin hma la
Commerce & Industries minister F Rodingliana chuan, Mizoram New Capital Complex (MINECO)-ah tualchhung kutthemthiamte thil siam zawrhna hmun tur bazar (mall) lian sa turin Commerce & Industries department-in hma an lak mek thu a sawi.
Nimin khan Saitual Auditorium-ah NITI Aayog hnuaia Aspirational Block-te hmasawnna tura inelna, Sampoornata Abhiyan-a Ngopa block aṭanga hna thawk ṭhate lawmpuina, Sampoornata Abhiyan Samman Samaroh buatsaih a ni a, minister F Rodingliana'n a hmanpui.
F Rodingliana chuan, Mizo thil siamte theh lâr uar a ṭul thu sawiin, "CI department chuan tualchhung kutkawihte zawrh chhuahna hmun tur mall lian MINECO-ah sa turin hma a la mek a, kan puitlin theih chuan Mizoram hmun kilkhawr bera tualchhung kutchhuakte pho chhuahna tur ṭha tak a ni ang," a ti.
NITI Aayog-in aspirational block-te hmasawnna tura inelna a buatsaihah Ngopa RD Block chu ti ṭha ber leh Mizorama NITI Aayog tehfung/parameter paruk tihlawhtling vek thei awm chhun a nih thu sawiin Minister chuan, "District Bawrhsap leh a thawhpui te, BDO leh line department hotute leh frontline worker-te thawhrimna vang a ni. Ngopa RD block hi chawi kan ngai bik, aspirational block a ni reng tur a ni lo," aspiration block ni lo turin kil tinah ṭanho a ngaih thu a sawi.
F Rodingliana chuan, Ngopa damdawi-in (CHC) leh quarters sak ṭhatna tur pawisa sorkar aṭanga a awm tawh thu te, hna ṭan mai theih a nih tawh thu te, Mizoram sorkarin district tinah ICU dah vek turin hma a lak thute a sawi bawk.
Sampoornata Abhiyan Samman Samaroh-ah hian CI Minister hian hna thawk ṭhate hnenah chawimawina a hlan. July 30, 2025 thleng awh tur tualchhung kutkawih phochhuahna ‘Aakanksha Haat' buatsaih nghal a ni a, DC pisaa thawkte'n Aadhaar update leh certificate pawimawhte a mamawhte tan a thlawnin an siamsak a, Health department-in a thlawnin BP leh blood sugar an endik a ni.