KHAWTHLIR

Minister-in lawmpui

Minister of state Lalnghinglova Hmar chuan Mizoram University Undergraduate Exam 2025 leh Postgraduate Exam 2025-a a bial Aizawl West-II chhunga top 10-a lang mi pariatte hnenah nimin khan a pisaah lawmpuina Rs 10,000 ṭheuh leh thuchei a hlan. Minister chuan, an thiamnate thil tak takah chantir turin zirlai pass tharte a chah a, "Hmasawn tur chuan a bulṭhutah lehkha kan thiam a pawimawh. Chumi kawngah chuan nangni hi in veng ṭheuhah a meichher chhitu ni u la ka duh," a ti a, hmasawn zel turin a chah.

Computer inzirtir

Information & Public Relations Directorate leh Sunset Computer Centre, Kulikawn chuan nimin khan IPR conference hall-ah IPR hnuaia ministerial staff-te tan ‘Training on Basic Computer Knowledge’ an buatsaih a, IPR secretary Betsy Zothanpari Sailo-in a hawng. Training-ah hian IPR Directorate leh district office hrang hrang aṭangin mi 26 an tel a, August 2, 2025 thleng a awh ang.

Ramngaw sawiho

Khawzawl bawrhsap K Vanlalṭhiana hoin nimin khan District Level Committee an ṭhukhawm a; chawlhkar khat chhungin Khawzawl district-a dan hnuaia ramngaw humhalh mek leh humhalh tura rawtna thar awmte a hmunah enfiah a, mipui leh khawtlang hruaitute remtihna ngeia rawtnate State Expert Committee hnena thlen an rel. Kum 1997-a State Expert Committee-in affidavit hmanga Supreme Court hnena danin a huam loh ramngaw (non-notified tree forest) a thehluh zingah Khawzawl district-a Zàwlnghak, Bualphung ngaw, Vankal ngaw leh Ngaizawl te a tel a ni.

BJP inkhawm

BJP, Mizoram Pradesh chuan nimin khan Aizawla an pisaah political session an hmang a, thusawitu Dr Zonuntluanga chuan, India ram chu diplomacy-ah a ṭha hle nia sawiin, "Kan ṭhatzia chu Operation Sindoor-ah a hriat theih. Hmâna ram ngaihtuahawm zinga awm ṭhin kha tunah chuan ram economy lian ber palina kan ni tawh a, hei hi Pu Modi-a kaihhruai sorkar hmel lanna pawimawh tak a ni," a ti.