Mamitah Sampoornata Abhiyan Award sem

Mamit bialtu MLA H Lalzirliana chuan nimin khan Mamit Siamliana Hall-ah NITI Aayog hnuaia aspirational district leh aspirational block-te hmasawnna tura inelna, Sampoornata Abhiyan-a Mamit district leh Reiek RD block aṭanga thawk ṭhate hnenah Sampoornata Abhiyan Award a sem a; kar khat awh tur tualchhung siam thil siamte pho chhuahna Aakanksha Haat a hawng.

Sampoornata Abhiyan hi July-September 2024 thlenga India rama Aspirational district leh Aspirational block-ahte kalpui a ni a; Mamit district leh Reiek block chuan bronze an hmu a ni.

Mamit MLA chuan, sorkar laipuiin Vision 2047 nasa takin a kalpui a, 2047-ah chuan India chu ram changkang leh intodelh (developed country) a nih theih nan ṭan lak mek a nih thu a sawi a, "Kan ram pawhin ram changkangte kan ûm pha mek zel a, hemi hmasawnna atana hma lam kan panna pawimawh tak pakhat chu Sampoornata hi a ni," a ti.

H Lalzirliana chuan, Mamit district chu Aspirational District ni mah se, zirnaah te, hriselna leh inenkawlnaah te leh kawng hrang hrangah hma an sawn zel a, entawn tlak an nih thu a sawi a; ram changkang apiangin zirlaite chawi kân an tum ṭhin tih sawiin, Mamit district pawhin hma lam a pan zel thu a sawi a ni.