CM's Special Package dawng tur Lunglei district-ah mi 362 an awm

Bána Kaih (Handholding) scheme hnuaia Chief Minister's Special Package dawng tur progress partner Lunglei district-ah mi 362 an awm a; a dawngtu turte hnenah ṭanpuina sum pek thuai tum a ni.

Lunglei bawrhsap Navneet Mann hoa nimina sorkar hotute an ṭhukhawm a; tarlan danin, CM's Special Package hnuaiah Lunglei district-ah bána kaih tur (progress partner) mi 362 an awm. Chungte chu - Commerce & Industries department hnuaiah mi 130, Horticulture hnuaiah mi 78, AH&Vety hnuaiah mi 77, Fisheries hnuaiah mi 46, Agriculture hnuaiah mi 14, LRSWC hnuaiah mi 13 leh, Tourism leh Sericulture department hnuaiah pahnih ve ve an ni.

Ṭhutkhawmah hian, progress partner-te hmalakna tura kaihhruaina leh thil pawimawh zirtirna atan July 31, 2025-ah BCM Hall-ah orientation training buatsaih an rel a; orientation training buatsaih ní-ah emaw, a tukah emaw ṭanpuina sum a dawng turte bank account-ah thun hman an tum a ni.

Orientation training-a mahni ngei kal lote chu ṭanpuina sum hi pek theih a ni dawn lo a; bána kaih turte chu orientation training-ah mahni ngei tel tur leh an bank account number thehluh ngei passbook keng tura hriattir an ni.