Minister-in Skills on Wheels a khuhhawng

Thiamthil tihhmasawnna (skill development) tihhmasawnna leh inzirtirna atana hman theih tur, bungrua/hmanrua chi hrang hrang phur thei tura duan lirthei, 'Skills on Wheels' tia vuah chu nimin khan Labour, Employment, Skill Development & Entrepreneurship (LESDE) minister Lalnghinglova Hmar-in LESDE directorate-ah a hawng.

LESDE Minister chuan, Skills on Wheels lirthei chu Mizoram tana ṭangkai tak a nih a rin thu a sawi a, "Thil thar a ni a, tun hi a bul ṭanna chauh la ni mah se, a phûrawm hle. He hmalakna hi a bikin thingtlang tan a ṭangkai dawn a, skill development kalpui department dang tan pawh a ṭangkai dawn a ni," a ti.

Lalnghinglova Hmar chuan, sorkar laipuiin skill development a tuipui avangin LESDE department chu a pawimawh chho dawn tih sawiin, "Skill development-ah hian ṭhuang hrang hrang awm mah ila department khat hnuaia awm kan ni a, department chak leh pawimawh ni tur chuan thawhhona ṭha a pawimawh," a ti a; Skills on Wheels chu August 2025 aṭangin che chhuak ṭan tura beisei a nih thu a sawi.

'Skills on Wheels' hi Ministry of Skill Development and Entrepreneurship (MSDE) project pakhat SANKALP scheme State Incentive Grant hnuaia hmuh a ni a; Mahindra Bolero Camper 4wd PSD, m2DiCR4 (5 seater) lei niin, a leina leh cheina atan Rs 17,05,170 hman a ni.

Lirthei hi skill development mobile training centre tura ruahman a ni a; a tum ber chu - skill development/vocational training job role thlan bikah thingtlang lama training buatsaihna atan a ni. Bul ṭanna atan assistant electrician leh mason general training buatsaih tum a ni.