Assam-in a hnawhchhuahte Mizorama an luh loh nan hma la turin CYMA-in a ngen

Central YMA chuan thuchhuah siamin, Assam sorkarin ram dang mi dan loa an state-a awmte a hnawh­chhuah mek avangin Inner Line Permit (ILP) pekah fimkhur turin sorkara thuneitute an ngen a; state ramri hnaiha awm YMA-te a ṭul anga hma la turin an chah bawk.

YMA Central Executive Committee chu July 28, Thawhṭanni zan khan an ṭhukhawm a; Assam sorkarin an state chhunga dan loa ram dang mi (Bangladesh aṭanga lut) awm an hnawhchhuahte Mizorama an rawn luh lohna tura hmalak dan tur an ngaihtuah.

CYMA chuan thu­chhuah siamin, Assam aṭanga hnawhchhuahte chu Assam ṭhenawm state-a an luh lohna turin state dangte'n hma an la mek tih an tarlang a, "Kan state-ah pawh eng emaw zat rawn lut ve thei an nih avangin, lo inven dan turah sorkarin ruahmanna a la siam lo a nih chuan, siam thuai tur leh ILP pek chhuah kawngah fimkhur lehzual turin kan ngen," an ti.

Mizoram ramri hnaiha awm YMA sub-headquarters, group leh branch-te chu dan loa state dang aṭanga Mizorama rawn lut tur ven kawngah a ṭul anga hma la turin CYMA chuan an inhriattir bawk a ni.