Mizoram aṭangin Shiksha Samagam an chhim

Nimin khan Union Education minister Dharmendra Pradhan hoin Bharat Mandapam, New Delhi-ah New Education Policy 2020 kum 5 tlin pualin 'Akhil Bhartiya Shiksha Samagam' buatsaih a ni a; Mizorama district tina Prime Minister School for Rising India (PM Shri) ṭha thlan chhuah sikulte'n an sikul aṭangin online hmangin an chhim.

Aizawlah chuan Mizoram Institute of Comprehensive Education (MICE) aṭangin principal Lalrinkima, zirtirtute leh zirlaite'n Akhil Bhartiya Shiksha Samagam (All India Education Conference) an chhim a; sikul awmna veng Tuikual North Local Council member-te leh chanchinbumite'n an chhim bawk.

Lalrinkima chuan, PM SHRI atana thlan an nihna a la rei lo chungin theihtawp chhuaha hma an lak thu a sawi a, "MICE hi hun rei lo tê chauh PM Shri atana thlan kan la ni chungin Aizawl district-a Best PM Shri School-a thlan kan ni," a ti.

Samagam-ah hian Union minister Dharmendra Pradhan-a'n thu a sawi a; Mizoram bakah, Goa leh Tripura state-te chu kum 15 chin chung lam ziak leh chhiar thiam vekna, fully literate state-a puan tawh an nih thu sawiin, a lawmpui thu a sawi.

PM Shri hmalakna hnuaiah hian India ram pumah sikul 13,076 thlan niin, tihchangtlun chhoh mek a ni a; Mizoramah pawh music instructor, language instructor leh sports instructor te lak thar niin, zirna kalpui mek a ni.

MIZORAM AṬANGA CHHIMTUTE
1. MICE, Aizawl district
2. Model P/S, Lunglei Electric Veng, Lunglei district
3. New Light P/S, Siaha district
4. Zokhawthar P/S, Champhai district
5. Kolasib Model P/S, Kolasib district
6. Buangpui P/S, Serchhip district
7. EMRS Chawngte, Lawngtlai district
8. Kawrthah P/S, Mamit district
9. Ngopa P/S-II, Saitual district
10. Rabung P/S, Khawzawl district
11. Hnahthial P/S-I, Hnahthial district