Mizoramah job card 2,12,517 a awm: Chhungkaw pakhatah job card pakhat zel

Ni 100 inhlawhna, Mahatma Gandhi National Rural Employment Guarantee Scheme (MGNREGS) hnuaiah Mizoramah job card nei chhungkua 2,12,517 an awm mek. Kum liam ta 2024-25 khan ni 100 inhlawhna siam a ni a, kuminah pawh inhlawhna siam a ni nual tawh. MGNREGS-ah hian chhungkaw pakhatah job card pakhat aia tam neih phal a ni lo.

Rural Development minister Prof. Lalnilawma'n July 28, 2025-a a pisaa press conference a neiha a tarlan danin, Mizoramah job card nei chhungkua 2,12,517 an awm mek a, chhungkua 2,12,517 aṭangin hna thawk ṭhin (worker) 2,33,536 an awm a, chu'ng zinga mi 1,20,276 chu hmeichhia an ni.

Sorkar kum 2024-25 chhung khan Ministry of Rural Development-in Mizoram tana labour budget a pawm zat chu nuai 213 (person day) a ni a; wage component atan cheng nuai 59,158.0797 leh material component atan cheng nuai 913.61 hmuh niin, district tinah ni 100 inhlawhna siam a ni.

Kum kal mek 2025-26 chhunga inhlawhna atan Ministry of RD chuan Mizoram tan cheng nuai 210 (person day) a pawm a, ni 100 inhlawhna siam kim theih beisei a ni. Tun dinhmunah sorkar laipuiin wage component atan cheng nuai 35,326.15863 leh material component atan nuai 2,207 a rawn pe tawh.

MGNREGA hnuaiah hna thawh theih hlawm (category) pali - Public Works Related to Natural Resource Management, Individual/Community Assets for Vulnerable Sections, Common Infrastructure for NRLM Compliant SHGs leh Rural Infrastructure-te a awm.

Hna thawh theih hlâwm li-ah hna chi hrang 266 a awm tih sawiin RD Minister chuan, "Annual Master Circular 2024-2025 mil loa hna thawh hi department-in kan tum lo," a ti a; danin a sawi leh Annual Master Circular 2024-2025 in a sawi anga dik tak leh fel taka hna an thlan theih nan thawhpuiah VC/VEC, NGO leh mipui a sáwm.

Prof. Lalnilawma chuan, MGNREGS job card chu chhungkaw khatah pakhat chauh neih phal a nih thu a sawi a, "Chhungkaw khat aṭanga job card pakhat aia tam neih tumte'n ration card an ṭhentir ṭhin tih hriat a ni a, chhungkua, in danga cheng nih loh chuan chhungkaw khat aṭangin pakhat bak job card neih theih a ni lo tih mipuite'n kan hriat thar a ṭha," a ti.

RD Minister sawi danin, kum 2024-25 chhung khan MGNREGA hnuaiah sorkar department leh scheme hrang hrang 13 nen mumal takin thawhhona (convergence) kelpui a ni a; MGNREGA aṭangin cheng nuai 482.58 leh department/scheme dang aṭangin nuai 260.04 hman a ni.

Kumin 2025-26 ah department leh scheme hrang hrang 17 nen convergence hmanga thawhho tum mek a ni a; MGNREGA Project Rotling Hmasawnna Rahbi Thar hnuaiah thingtlang mipui hmasawnna tur project 15 kalpui mek a ni.

Sorkar kum kal mekah Aadhaar seeding 99.99%, ABPS 99.56%, FTO generation (T+8) 98.97%, work completion rate 97%, area officer visit 100%, registration of workers' mobile number 93.75%, verification of job card 99.59% leh Janmanrega registration 1,68,957 tih a ni tawh.

MGNREGA Annual Master Circular 2024-2025 Para 7.5.7-in a phût angin, MGNREGA hnuaia land development hna chu lo/huan atana neih tlak loh ram chhia leh kalsan tawh hmunte chei ṭhat nana thawh tur a ni a; mimal ram ṭha lai leh thlai chìn nana hman lai ramahte land development hna thawh phal a ni lo.