KHAWTHLIR

GAC-in thisen pe

Aizawl College NSS chuan nimin khan an campus-ah blood donation camp an huaihawt a, Civil Hospital, Aizawl tan thisen unit 201 an pe a, petute mipa 160 leh hmeichhia 41 an ni.

MHIP-in an dem

MHIP Gen.Hqrs chuan thuchhuah siamin, Lalremruati, Mission Vengthlangin a pasal Lalchhuanawma a that chu an dem thu leh a phû tâwka hrem ngei ni se an duh thu an tarlang. MHIP chuan, "Kan hmeichhiatpuite tana theihtawp kan chhuah laia hetiang pawikhawihna Mizo hmeichhiate'n kan ti ta mai hi hriatthiam harsa kan tiin, pawi kan ti tak zet a, tun chinah chuan tu'ma chungah thleng tawh lo se kan ti," an ti.

Dy Speaker-in hlan

Assembly deputy speaker Lalfamkima, Kolasib bialtu MLA chuan nimin khan Kolasib College-ah a bial chhung mi, kumin under graduate leh post graduate exam-a top 10-a tling mi pasarih hnenah laptop a hlan. Lalfamkima chuan, a biala zirlai zingah result ṭha tak nei an awm chu a lawm thu sawiin, kawng an la zawh zel turah tumruhna nen theihtawpa ṭan la turin a chah.

Financial Literacy

Urban Development & Poverty Alleviation department hnuaia DAY-NULM leh Institute of Chartered Accountants of India hnuaia Financial & Tax Literacy Directorate chuan nimin khan AMC huam chhunga self help group member mi 100 tan sum hman leh ruahman dan, khawl leh peipun dan leh inbumna laka inven dan zirhona, Financial Literacy Workshop an buatsaih. Thupui chu 'Smart Financial Choices for the Urban Livelihood of Mizoram' tih a ni a, UDPA secretary Lalmalsawma Pachuau khuallian niin, director Jacob Lalawmpuia'n a kaihruai a ni.

AMPEDA pawm

All India Petroleum Dealers Association (AIPDA) chuan an member atan All Mizoram Petroleum Dealers Association (AMPEDA) an pawm thar. AMPEDA hian AIPDA member nih an dil a, AIPDA chuan an pawm thu nimin khan an rawn hriattir a ni.