Chhungkaw 35 hnenah chhawmdawlna hlan

Disaster Management & Rehabilitation (DMR) minister Pro. Lalnilawma chuan nimin khan Bawngkawn Hmarveng KPP Hall-ah khuarel chhiatna vanga harsatna tawk chhawngkaw 35 hnenah chhawmdawlna a sem.

Chhawmdawlna hi HT Parekh Foundation Mumbai-in an CSR hmanga Mission Foundation Movement (MFM) kaltlanga an pek a ni a; DMR Minister hian chhungkaw panga hnenah tuizem pakhat ṭheuh leh chhungkaw 30 hnenah buhfai leh alu a hlan a ni.

DMR Minister chuan, khuarel chhiatnaah ven theih loh a awm ṭhin thu a sawi a, "Hetiang hunah hian sorkar chu mipui tan theihtawp chhuah ṭhin mah se, a tih theih chin a awm avangin chhiat tâwkte intuamhlâwm kawngah khawtlang hruaitute bengvarna, tlawmngai pawlte tlawmngaihna leh Mizo khawtlang nuna inṭanpui tawn kan nihnate hi kan vanneihpui ṭhin," a ti.

MFM chu Mizo ṭhalai tam takte tan thiamna petu a nih thu sawiin Prof. Lalnilawma chuan, "Eizawnna an siamsak bakah khawtlang rawngbawlna kawngah an bengvar a, sorkar thlawptu pawimawh tak an ni. DMR Minister ka nihna angin chhiatrupna a thlen hian khawtlang hruaitute leh tlawmngai pawlte an hlutzia ka hmuh chiang em em a ni," a ti a; MFM leh mipui tana luanchhuah duh pawlte chu sorkar thâ tichaktu an nih thu a sawi.

Chhawmdawlna hlanna inkhawm hi MFM director R Vanlalzauva'n a kaihruai a ni.