Special Package inhrilhfiah

Bána Kaih scheme hnuaia Chief Minister’s Special Package dawng tura thlan (progress partner)-te tan nimin khan Siaha leh Lawngtlaiah orientation training buatsaih a ni.

Siahaa chuan DRDO Conference Hall-ah orien­tation training buatsaih a ni a, bawrhsap VL Hruaizela Khiangte-in a hmanpui. Bawrhsap chuan, an district-ah progress partner 35 chauh an awm chu pawi a tih thu sawiin, "Sorkar scheme leh programme-te party bil bik ta emaw kan ti ṭhin hi sorkar aṭanga ham­ṭhatna dawn tur awmte tiṭhuanawptu lian tak a ni. Mipui vantlang hamṭhatna tura sorkarin scheme a duante hmang ṭangkai turin bengvàr chhuah ṭhin a pawimawh," a ti.

Siaha district-ah hian Agriculture department, AH&Vety, Commerce & Industries, Horticulture, Tourism leh IPR depart­ment hnuaiah progress partner 35 an awm a, training-a telte hnenah DC-in certificate a hlan.

Lawngtlaiah chuan bawrhsap Cheemala Siva Gopal Reddy kaihhruaiin DC conference hall-ah training buatsaih a ni. Lawngtlai district-ah hian CM Special Package dawng turin department paruk hnuaiah mi 81 an awm.

Bawrhsap chuan, sorkarin progress partner atan mi taima leh rinawm, hlawhtling taka thawk tura a beiseite a thlan thu sawiin, "Special Package hnuaia hamṭhatna awm ang angah zirtirna ṭha tak in dawng dawn," a ti a, an thil zirte chu hre chianga vawng tlat turin a chah. DC hian training-a telte hnenah certificate a hlan a ni.