Covid-19 hi politics-a inbeihna atan hman ni lo se - Health Minister
Health minister Dr R Lalthangliana chuan, Covid-19 léng mek chu politics thila inbeihna atan hman ni lo se a duh thu a sawi a; Chief Minister thilphal tak kan nei a ni, a ti.
Nimin khan Health Minister hoin minister Dr K Beichhua, Health & Family Welfare Board vice chairman Dr ZR Thiamsanga, Indian Medical Association (IMA) Mizoram State Branch, Mizoram Government Doctor Association (MGDA) leh sorkar official-te Secretariat conference hall-ah ṭhukhawmin Covid-19 chungchang an sawiho a; Minister hian thu a sawi a ni.
Dr R Lalthangliana chuan, Covid-19 atan state fund aṭangin sum a awm lo nia sawite an awm thu sawiin, "Covid-19 atana kan Chief Minister thil phalzia hre chiangtute chu Health department-a thawkte kan ni," a ti a; an mamawh an dilte CM-in a tihhlawhtlinsak zel thu a sawi.
Health Minister chuan, Covid-19 léng mekah Chief Minister-in ṭhahnem a ngai a, harsatna an neihte a hriatthiampui ṭhin thu sawiin, "Kan CM nen hian kan inzuina a rei tawh a, ani tluk an awm lo. Kan inthláwp ṭha lutuk. Minister-te pawhin an department ṭan ve theihna turah a tàwpkhâwk an thleng. Covid-19 hi politics thilah inbeihna atan hman lo hrâm hrâm a ṭha," a ti.
Meeting-ah hian tun hnaia ramria feh chhuak Medical Operational Team-in local task force te, a bikin ramria bûk suala riakte mamawh chi hrang hrang leh thuam chak dan tur te, primary health centre (damdawi-in) thuam ṭhat lehzual dan tur te, ramria task force leh khaw kilkhâwra awmte mamawh, a bikin tui thianghlim leh buhfai phuhrûk dan turte leh, ni tin mamawh awlsam zawka ramria duty-te'n an lâk theih dan turte sawiho a ni.
IMA Mizoram Branch leh MGDA ṭangkawpin inkhârkhip hlih a nih huna inkaihhruaina tur an ruahmante thlirho a ni bawk.