KHAWTHLIR
CM Relief Fund
Covid-19 dona atan nimin khan tlai dar 4 thlengin pawl leh mimal 12-te'n Chief Minister's Relief Fund-ah Rs. 26,39,956 an thawh a, online hmanga pe eng emaw zat an awm bawk. Nimina sum thawh zingah Land Resources, Soil & Water Conservation thawh Rs. 1,63,800, MIZOFED thawh Rs. 1,68,856, Mizoram Independent School Association thawh Rs. 4,30,000, Carrying Contractor Association thawh Rs. 1,00,000-te a tel.
Thisen pe
Nimin khan Aizawl Civil Hospital-ah Mizoram Cycling Association member-te'n thisen unit 25 an pe. ṬKP, Republic Vengthlang Unit pawhin AVBD ngenna angin thisen unit 20 an pe a, petute mipa 13 leh hmeichhia pasarih an ni. Nimina thisen petu zawng zawng leh Blood Bank-a thawkte tan David's Kitchen chuan chawchhun an tumsak a ni.
mCOVID-19 hmangin dil tur
Lunglei DC chuan, inkhàrkhip laia ṭul bik thila chhuahvah dilna chungchangah thuchhuah siamin, Lunglei district aṭanga district danga kal turte leh state dang aṭanga bungrua la lut turte'n DC office-ah dilna thehluh ngai tawh loin, mCOVID-19 application aṭangin task force lehkha nen online-a dil tawh tur a nih thu a tarlang.
Meihawl rawh tan
Mizoram Pollution Control Board (MPCB) chuan thuchhuah siamin, Mizorama meihawl rawhtu leh zuartute chu May 31, 2020 ral hma ngeiin MPCB office, New Capital Complex-ah inhriattir turin a chah a, pisaa kal thei lo tan phone number - 2336173, 2336591 leh 8794767753-ahte inhriattir tur a ni. Hei hi sorkar laipuia National Green Tribunal-in kaihhruaina a siam anga tih a ni.
BS-IV hun pawtsei
Lirthei khû tihtlemna atana Supreme Court-in BS-IV (Bharat Stage-IV) engine hmang lirtheite chu March 2020 thleng bâk registration ti mah se, Covid-19 léng leh inkhàrkhip vangin April thla chhung BS-IV lirtheite registration hun pawhsei a ni. Hun hawn belh hi hmang ṭangkai turin Transport department chuan mipui leh motor dealer-te a hriattir a, India sorkarin thu dang a neih loh chuan April 2020 hnu lamah BS-IV lirtheite register theih a ni tawh dawn lo.